Bədavi Hüseynov: “Ludoqorets” səfərinə iddialı yollanacağıq”

“Qarabağ”ın müdafiəçisi Bədavi Hüseynovun Futbolxeber.az saytına müsahibəsi

- “Kəpəz”lə oyunda qazanılan 3:0 hesablı qələbəni necə şərh edərdiniz?

- Oyuna pis başlamadıq. Hələ mövsümün əvvəlidir. Bu, hiss olunur. “Kəpəz” barədə də eyni sözləri demək olar. Görünür ki, onlar da tam hazır deyillər. Ümumilikdə bizim üçün yaxşı oyun alındı. Qol şanslarımız var idi. Daha da çox fərqlənə bilərdik.

- İlk hissədə hesabı açmaq üçün nə çatmadı?

- “Kəpəz” yaxşı müdafiə olunurdu. Onlara əhsən. Görünür ki, yaxşı təşkilatlanmış komandadırlar. Birinci hissədə fərqlənmək üçün qol imkanlarımız var idi. Onlardamn istifadə edə bilmədik. Fasilədən sonra oyunumuzu korrektə etdik və lazımi qolları vurduq

- Azarkeşlər “Qarabağ”ın “Kəpəz” üzərində adətən 5-6 qollu qələbələrinə öyrəşiblər...

- Hələ mövsümün əvvəlidir. Bir qədər oyun təcrübəsi lazımdır. Zaman keçdikcə artıracağıq.

- “Ludoqorets”ə məğlubiyyətdən sonra komandada əhval-ruhiyyə necədir?

- Komandada əhval-ruhiyyə yaxşıdır. Səfərə iddialı yollanacağıq. Çünki ilk görüşdə oyun baxımından “Ludoqorets”ə heç nədə uduzmamışdıq. Müəyyən çatışmazlıqları düzəltsək, hər şey yaxşı olacaq. Daha soyuqqanlı olmaq lazımdır. Eləcə də səfərdə Bakıdakından da yaxşı oynamalıyıq.

- Sizcə, “Ludoqorets”lə səfər matçında cütün taleyi baxımından hansı amil həlledici olacaq?

- Biz hər şeyə hazırıq. Hətta əlavə vaxta, penaltilərə də. “Ludoqorets” yaxşı komandadır. Heyətlərində çox güclü futbolçuları var. Əks hücumları da çox təhlükəlidir. Bir sözlə, hər şeyə hazır omalıyıq.

İbrahim Cəfərov