“Şerif”i nə tez unutduq?..

"Qurban müəllim, sizə elə gəlmir ki, futbol ictimaiyyəti, azarkeşlər, media "Ludoqorets"i çox kiçiltmişdi?" - bu sualı Qurban Qurbanova "Ludoqorets"lə oyundan sonra ünvanlamışdım. Həqiqətən də Ağdam klubu Bolqarıstan çempionuna rəqib olandan sonra hamı pley-off mərhələsində hansı klubların "Qarabağ"a rəqib ola biləcəyi ilə maraqlanırdı. Sanki artıq "Ludoqorets"i keçmiş(d)ik. Halbuki rəqibin avrokubok təcrübəsi, heyətindəki milyonluq oyunçular heç kimin "yadına düşmürdü". Yekunda ilk oyunda “Ludoqorets”in 2:1 hesablı qələbəsi artıq Zaqreb “Dinamo”su ilə pley-off matçına “hazırlaşanlar”a cavab oldu...

Yaxşı ki, Qurban Qurbanov və komandası bizim kimi rəqibi kiçiltmir. İnanırıq ki, çempionumuz cavab matçında Bakıdakı məğlubiyyətin əvəzini çıxıb, ÇL-də yoluna davam edəcək.

Amma görünən odur ki, biz hələ də arxa tullanmamış “hop” deməkdən əl çəkmirik. Çünki indi də eyni hal "Zirə" ilə bağlı yaşanır.

Dünənki "Osiyek"lə heç-heçədən sonra sosial şəbəkələrdə gedən müzakirələrdən belə "aydın olur ki", sanki Rəşad Sadıqovun komandası artıq pley-offdadır. Bir qədər irəli gedib, "görəsən, "Omoniya" güclüdür, yoxsa "Fehervar" düşüncəsində olanlar da var. Hələ mən "Zirə" artıq qrupdadı" fikrini səsləndirənləri demirəm...

Yəni biz həqiqətənmi bu qədər unutqanıq? Axı ortada acı "Şerif" xatirəsi var. "Zirə"nin Moldova klubuna Bakıdakı məğlubiyyətini nə tez unutduq? Özü də onda "qartallar" səfərdən heç-heçə deyil, qələbə ilə dönmüşdü. Gəl ki, bir səhv gedişatı tam dəyişdi. “Osiyek” Cəbəllütariq, San Marino, Andorra təmsilçisi deyil. Azərbaycanla futbolu arasında böyük fərq olan Xorvatiyanı təmsil edir. Bəli, Rəşad Sadıqovun komandası dünən xarakter nümayiş etdirdi, güclü rəqiblə başabaş mübarizə apardı. Lakin bu, bizə “Zirə” artıq “Osiyek”i keçib” deməyə/düşünməyə əsas vermir. Əmin olun ki, X orvatiya təmsilçisinə qarşı Bakıdakı matç “Zirə” üçün səfərdəkindən də çətin olacaq. Rəşad Sadıqov matçdan sonra təşkil olunan mətbuat konfransında əbəs yerə “Cavab matçında daha istəkli, daha güclü “Osiyek” gözləyirəm” deməyib. Odur ki, gəlin tələsməyək. “Zirə”nin “Osiyek”i üstələməsini hər birimiz istəyirik. Könül istər ki, Azərbaycan futbolu tarixində ilk dəfə olaraq pley-offda da, lap qrup mərhələsində də 3 təmsilçimiz olsun. Lakin səbirli olaq və heç bir rəqibi kiçiltməyək.

İbrahim Cəfərov