Qriqorçuk: “Nəticədən razı deyiləm”

“Heç-heçə bizim üçün pozitiv nəticə deyil. Nəticədən razı deyiləm. "Neftçi" böyük tarixi, böyük adı olan komandadır. Təbii ki, öz evimizdə qalib gəlməliyik”.

Futbolxeber.az saytının məlumatına görə, bu sözləri “Neftçi”nin baş məşqçisi Roman Qriqorçuk Azərbaycan Premyer Liqasının ilk turunda "Turan Tovuz”la qolsuz bərabərə qaldıqları matçdan sonra deyib.

Ukraynalı mütəxəssis nəticədən olmasa da, oyundan razı qalıb: “Pis oynadığımızı da deyə bilmərəm. Biz yaxşı oynamağa cəhd göstərirdik. Bəzi epizodlarda pis görünmürdük. Qalib gəlsəydik, daha asan olardı, indi başqa cür danışardıq”.

O qeyd edib ki, komadası son 10 dəqiqədə deyil, bütün oyun boyu fəal çıxış etməlidir: “Təəssüflər olsun ki, vaxt da çatmadı. Razıyam ki, bu cür son dəqiqələrdə yox, bütün oyunboyu oynamaq lazımdır. Xüsusilə də, evdə, öz azarkeşlərimizin qarşısında”.

Yenidən ölkəmizdə qayıdan məşqçi bütün bu illərdə Azərbaycandan uzaq olduğunu hiss etmədiyini söyləyib: “Çünki daim jurnalistlərlə danışırdıq, müsahibələr verirdim. Tam olaraq Azərbaycan futbolundan uzaqlaşmamışdım”.

R.Qriqorçuk “Neftçi Arena”nın qazonu haqda kritik fikirlər bildirmək istəməyib: “Çünki obyektiv səbəbləri var. Mən hamıya deyirdim ki, bu arenanı çox sevirəm. Burada "Qəbələ" ilə oynayırdıq. Meydança əla olurdu. İstəyərdik ki, ot örtüyü daha da yaxşı olsun”.

“Neftçi”nin çalışdırıcısı hücum xəttini gücləndirmək istədiklərini söyləyib: “Bu addımı atsaq, komanda hücumda daha effektiv olacaq”.

Qriqorçuk matçı stadiondan izləyən həmyerlisi Aleksey Kaşukla bağlı sualı belə cavablandırıb: “Kaşukla şəxsən tanış deyiləm. Onunla danışmamışıq. Bilirəm ki, Kaşuk yüksək səviyyəli, yaxşı oyunçudur. Ona ancaq salamlarımı çatdıra bilərəm”.