Elmar Baxşıyev: “Məni rəqib yox, öz komandam düşündürür”

“Araz-Naxçıvan”ın baş məşqçisi Elmar Baxşıyevin Futbolxeber.az saytına müsahibəsi

- Artıq Ərzurum toplanışını başa vurmaq üzrəsiniz. Komandanın hazırlıq səviyyəsindən razısınız?

- Toplanış plana uyğun şəkildə davam edir. Bu gün keçirəcəyimiz yoxlama oyunu ilə Ərzurumdakı hazırlığımızı yekunlaşdırıb Bakıya dönəcəyik. Demək olar, mövsümün hazırlıq mərhələsini Türkiyədə reallaşdırdıq. Yeganə üzücü məqam əvvəlcədən planlaşdırıldığı qədər - 3 oyun keçirə bilməməyimizdir.

- Transfer çalışmaları nə yerdədir? Daha hansı mövqeləri gücləndirmək istəyirsiniz?

- Transfer çalışmalarını demək olar ki, artıq yekunlaşdırdıq. Əgər alınsa, bir transfer istəyərdik.

- Hansı mövqeyə?

- Arxa xəttə. Mümkün olsa, müdafiəni gücləndirmək üçün.

- Daha əvvəl birgə çalışdığınız Maçado və Santosu da komandaya cəlb etdiniz. Demək olarmı ki, Elmar Baxşıyev daha əvvəl çalışdığı, daha yaxından tanıdığı futbolçularla işləməyə üstünlük verir?

- Əksər məşqçilər istəyər ki, yaxşı tanıdığı futbolçularla işləsin. Hər iki oyunçu ilə vaxtı ilə bir komandada işləmişik və nəyə qadir olduqlarını bilirik. Həm Maçadonun, həm də Santosun komandamıza kömək edəcəklərinə inanıram.

- İlk turda “Qarabağ”la qarşılaşacaqsınız. Sizcə, püşkdə “Araz-Naxçıvan”ın bəxti gətirmədi? Yoxsa düşünürsünüz ki, həm ilk tur olduğundan, həm rəqibin avrokuboklarda mübarizəni davam etdirməsi səbəbindən çempionla elə əvvəldə qarşılaşmaq daha yaxşıdır?

- Bəxtdən şikayətlənməzdim. Onsuz bütün komandalarla qarşılaşacağıq. Bu gün məni rəqib yox, öz komandam, futbolçularımın matça hazırlığı düşündürür. “Qarabağ”a isə avrokuboklarda uğurlar arzulayıram.

İbrahim CƏFƏROV