Ayxan Abbasov: “Dövlətin qoyduğu qanundan kənara çıxa bimərik”

“Şamaxı”nın baş məşqçisi Ayxan Abbasovun Futbolxeber.az saytına müsahibəsi

- “Şamaxı” artıq 2 yoxlama oyunu keçirib. Bu matçlarda komanda necə təsir bağışladı? Hansı müsbət və mənfi məqamları qeyd edə bilərsiniz?

- Bəli, artıq 2 oyun keçirmişik. Əlbəttə, yoldaşlıq matçları ilə çempionat görüşləri tam fərqlidir. Üstəlik, bu 2 qarşılaşmada futbolçular ağır yükləmələr fonunda oynayıblar, tam formada deyillər. Lakin istəkli olmaları bizi sevindirir, qane edir. Taktiki və fiziki cəhətdən çox artırmalıyıq. Təbii ki, müsbət olduğu kimi, mənfi məqamlar da var. Onları da oyundan oyuna aradan qaldırmağa çalışacağıq. Çünki bizi qarşıda çox gərgin çempionat gözləyir.

- Məlum məsələdir ki, mövsümün startında heç bir komanda 100 faiz hazır olmur. Necə düşünürsünüz, “Şamaxı” təxminən neçənci turda optimal formada olacaq?

- Təzə komandayıq. İndiki məqamda hansısa faizlə götürə bilmərik. Yeni gələn, komandaya gec qoşulan futbolçular turdan tura daha yaxşı vəziyyətə gələcəklər, daha optimal formaya düşəcəklər. Bunun üçün isə vaxt və oyunlar lazımdır.

- İlk turda “Sabah”la qarşılaşacaqsınız. Rəqibin 3 gün əvvəl avrokubok oyununun olması “Şamaxı” üçün cüzi üstünlük hesab edilə bilər?

- “Sabah” həmişə iddialı olub. Düzdür, bizdən 3 gün öncə Konfrans Liqasında oyunları var. Geniş heyətləri var. Odur ki, bizimlə oyunda rotasiya edə bilərlər. Üstəlik, müasir futbolda üç gündən bir oynamaq problem deyil. “Sabah”la evdə oynayacağıq. Yeganə üstünlüyümüz budur və çalışacağıq ki, bu üstünlükdən faydalanaq.

- Daha sonra “Araz-Naxçıvan”, “Qarabağ”, “Zirə” və “Neftçi” ilə qarşılaşacaqsınız. İlk 5 turda 4 iddialı rəqib. Bu 5 turda “Şamaxı” necə xal toplasa, sizi qane edər?

- Düz qeyd etdiniz, ilk 5 turda bizim üçün çox ağır komandalar düşdü. “Qarabağ”, “Zirə”, “Neftçi”, “Sabah” - hər biri medallara namizədlərdir. Üstəlik, “Araz-Naxçıvan” bu yay ən yaxşı transferlər edən komandalardandır. Komandamız düşünürəm ki, 3-4 turdan sonra ideal formada olacaq. Çalışacağıq ki, xal qazanaq. Buna ehtiyacımız var. Konkret neçə xal deyə bilmərəm. Amma qazanılan hər xal bizi qane edəcək. Xallarımızı bacardığımız qədər artırmalıyıq. Çünki bizi qarşıda gərgin mübarizə gözləyir.

- Transfer çalışmalarını artıq bitmiş hesab etmək olar? Yoxsa hələ də gücləndirmək istədiyiniz mövqelər var?

- Xeyr, transfer çalışmalarımız bitməyib. Hələ də boşluqlar, gücləndirmək istədiyimiz mövqelər var. Bunun üzərində işləyirik. Heç də asan deyil. Amma inanıram ki, inşallah yaxın zamanlarda bütün bu məsələləri yekunlaşdırmağa nail olacağıq.

- Yeni transferlərdən olan Lubeni Haukonqo ilə müqavilə ləğv edildi və bildirildi ki, futbolçu Azərbaycan Respublikasının qanunvericiliyinə əsasən ölkədə yaşamaq icazəsi ala bilməyib. Konkretləşdirsək, problem nə idi? Nə üçün Haukonqoya Azərbaycanda yaşamaq üçün icazə verilmədi?

- O, miqrasiyadan keçə bilmədi. Bilirsiniz ki, Azərbaycanda yaşamağa görə icazə almaq üçün müəyyən testlərdən, analizlərdən keçməlisən. Haukonqonun səhhətində olan bəzi problemlər Azərbaycan qanunvericiliyində qəbul olunmur. Əsas səbəb bu idi. Biz də dövlətin qoyduğu qanundan kənara çıxa bimərik.

İbrahim CƏFƏROV