“Sumqayıt” Monteneqro millisinin hücumçusunu transfer etdi

2024/25 mövsümü üçün transfer çalışmalarını davam etdirən “Sumqayıt” daha bir futbolçunu heyətinə cəlb edib.

Futbolxeber.az saytının məlumatına görə, Nikola Vuynoviç ilə 1+2 illik müqavilə imzalanıb. Monteneqrolu hücumçu “Sumqayıt”da 9 nömrəli formada çıxış edəcək.

27 yaşlı futbolçu karyerasına “Radniçki Obrenovac”da başlayıb. Qısa müddət icarə əsasında “Rad”da çıxış etdikdən sonra Vuynoviç “Vilyarreal”a transfer olunub. 2015-2018-ci illəri La Liqa təmsilçisinin C komandasında (46 oyun, 9 qol) forma geyən monteneqrolu növbəti futbol ilini “Vilyarreal”in B komandasında (18 oyun, 3 qol) keçirsə də, əsas heyətə yüksələ bilməyib. Daha sonra o, “Podqoritsa”, “Vozdovac”, “Sportinq Kansas City” və “Qoritsa”da çıxış edib.

Monteneqronın U-17 (3 oyun, 1 qol), U-19 (6 oyun, 6 qol) və U-21 millilərinə (9 oyun) dəvət alan Vuynoviç 2020-ci ildə ölkəsinin əsas yığmasında debüt edib. Geridə qalan müddətdə “Sumqayıt”ın yeni transferi millidə 5 matçda 1 qol vurub.

Qeyd edək ki, “Sumqayıt” yay fasiləsində daha əvvəl Rəhim Sadıxov, Fernando Medeiros və Slavişa Radoviçin keçidini rəsmiləşdirib.