Samir Abasov: “Komandam meydanda istədiyimi göstərə bildi”

“Yeni mövsümün hazırlıqlarının ilk mərhələsinə Sumqayıtda start verdik. Orada daha çox fiziki və güc məşqləri üzərində çalışdıq. Artıq 4 gündür Qızılcahamamdayıq. Burada isə daha çox taktiki məşqlər üzərində işləyirik”.

Futbolxeber.az saytının məlumatına görə, bu sözləri “Sumqayıt”ın baş məşqçisi Samir Abasov klubun mətbuat xidmətinə açıqlamasında deyib.

Təcrübəli mütəxəssis bu gün Qızılcahamamda təlim-məşq toplanışı çərçivəsində Rusiyanın “Orenburq”a klubuna 1:2 hesabı ilə uduzduqları yoxlama görüşünü belə şərh edib: “Hazırlıq prosesində ilk oyunumuz idi. Çalışdıq ki, düşərgədə olan bütün futbolçulara şans verək. Matç ərzində işlədiyimiz taktiki gedişləri bir də sınaqdan keçirdik. Bu cür oyunlarda nəticə önəmli deyil. Əsas məqsəd oyunçularımı iş başında görmək idi, buna da nail olduq. Düşünürəm ki, komandam meydanda onlardan istədiyimi göstərə bildi”.