“Qarabağ” dünya reytinqində 14 pillə irəlilədi

Beynəlxalq Futbol Tarixi və Statistikaları Federasiyası (IFFHS) klubların yeni dünya reytinqini açıqlayıb.

Futbolxeber.az saytının məlumatına görə, reytinq klubların 2023-cü ilin 1 iyulundan 2024-cü ilin 30 iyununa qədər olan dövrdəki nəticələrinə əsasən hazırlanıb.

504 komandanın yer aldığı siyahıya 371 xalla “Real” başçılıq edir. “Mançester Siti” 2-ci (369 xal), “Bayer Leverkuzen” isə 3-cü yeri tutur (355 xal).

Azərbaycan reytinqdə 4 klubla təmsil olunur. “Qarabağ” sıralamada 39-cu yerə yüksəlib. Ağdam klubunun hesabında 191,25 xalı var. Qurban Qurbanovun komandası “Yuventus”, “Mançester Yunayted”, “Napoli” kimi klubları qabaqlayıb.

Azərbaycanın digər təmsilçilərinə gəlincə, “Zirə” 62,25 xalla 361-ci (+8), “Sabah” 60,75 xalla 379-cu (+9), “Neftçi” isə 59,25 xalla 397-ci (+6) yeri tutur.