“Nə qədər ağır olsa da, “Kəpəz” kimi köklü klub ancaq elitada qalmaq uğrunda mübarizə aparacaq”

“Kəpəz”in baş məşqçisi Adil Şükürovun Futbolxeber.az saytına müsahibəsi

- Əvvəlcədən “Kəpəz”in məşqlərə iyunun 20-də başlayacağı bildirilsə də, sonradan deyəsən, planlar dəyişdi...

- Bəli, bildirmişdik ki, iyun ayının  20-də hazırlığa start verəcəyik. Lakin bəzi təşkilatı məsələləri tamamlaya bilmədik və bunun üçün  hazırlığa bu gün - iyunun 22-də  başlayacağıq. 

- Ümumiyyətlə, hazırlıq prosesi neçə mərhələdən ibarət olacaq, sonrakı planlar necədir?

- Hazırlıq prosesini 4 hissəyə böldük. Birinci mərhələdə  komandamıza qatılmaq istəyən bəzi  futbolçulara baxacağıq, onları sınaqdan keçirəcəyik. Ardınca birinci mərhələdə fərqlənən  oyunçuların əsas komandanın  hazırlıq prosesinə qatılmasını  planlaşdırırıq. Üçüncü mərhələdə  kollektivdə olanların uyğunlaşması və komanda oyununun futbolçulara  aşılanmasını fikirləşirik. Sonuncu - dördüncü mərhələdə isə daha çox  yoldaşlıq oyunları ilə komanda  oyununu yaxşılaşdırmağa  çalışacağıq.

- Transferlərlə bağlı nə kimi yeniliklər var?

- Transfer edə biləcəyimiz legioner futbolçuları diqqətlə izləyirik. Hələlik bizə uyğun oyunçular  yoxdur. Amma axtarışlarımız davam edir.

- Junior Martins komandadan ayrıldı, Amil Yunanovun gedəcəyi deyilir. Belə görünür ki, ötənilki heyəti qorumaqda çətinlik çəkəcəksiniz...

- Hazırda geridə qoyduğumuz  mövsümdən 7-8 futbolçumuzla  danışıqları müsbətə doğru  sonlandırmaq üzrəyik.

- “Kəpəz”lə bağlı əsas suallardan biri sponsor məsələsidir. Bu istiqamətdə nə yenilik var?

- Sponsor məsələsi “Kəpəz” üçün əlçatmaz kimi görsənir. Lakin biz ümidlərimizi heç vaxt itirməmişik və inanırıq ki, Azərbaycanın ikinci  ən böyük şəhərinin komandasına  dəstək göstəriləcək. Dövlət başçısı cənab İlham Əliyevin Gəncədə  dünya standartlara uyğun stadionun tikilməsi üçün göstəriş verməsi, Gəncə şəhərinə dövlətimiz  tərəfindən olan diqqətin bariz nümunəsidir. İnşallah stadionla  yanaşı, “Kəpəz”ə tezliklə iş adamlarının da dəstək olacağını görəcəyik.

- Şər deməsən, xeyir gəlməz, sponsor olmasa, düşünmürsünüz ki, işiniz çox çətin olacaq?

- İnşallah mən pozitiv fikirləşirəm və dəstəyin olacağına da çox ümidliyəm. Amma biz hər cür gedişata hazırlaşmalıyıq. Ona görə də bu il komandanın qarşısında olan əsas məqsəd Premyer Liqada qalmaqdır. Nə qədər ağır olsa da, “Kəpəz” kimi köklü klub ancaq elitada qalmaq uğrunda mübarizə aparacaq. Digər klublarla müqayisə  olunmayacaq dərəcədə büdcəsi aşağı olan komandanın Premyer Liqada yüksək yerlər uğrunda mübarizə aparması çox çətin görsənir. Amma biz yenə də mübarizə aparacağıq.

- Sizcə, “Kəpəz”ə biganəliyin səbəbi nədir? Ölkənin ikinci ən böyük şəhərinin klubuna niyə yaxın durmaq istəyən iş adamı, sponsor yoxdur?

- Bu sualı bəzən mən də Gəncədə olan bəzi tanıdığım azarkeşlərə verirəm. Amma çox təəsüflər olsun ki, buna cavab yoxdur.

İbrahim CƏFƏROV