“Zirə”nin qapıçısı: “Avroliqada bacardığımız qədər irəli getmək istəyirik”

“Zirə”nin qapıçısı Aydın Bayramov UEFA Avropa Liqasının püşkünü dəyərləndirib.

Futbolxeber.az saytına müsahibəsində 28 yaşlı qolkiper Moldova təmsilçisi “Şerif”in güclü rəqib olduğunu bildirib: “Şerif” Avropada çox təcrübəli kollektivdir. Bu komandanın həm Çempionlar Liqasının qrup mərhələsindəki çıxışını, həm də daha əvvəl “Qarabağ”a qarşı oyunlarını izləmişik. Yaxşı rəqibə qarşı oynayacağımızın fərqindəyik. Bununla belə, mərhələ adlamaq üçün əlimizdən gələni edəcəyik”.

“Şerif”i mübarizədən kənarlaşdıracağı təqdirdə “Zirə” Avroliqanın II təsnifat mərhələsində “Elfsborq” (İsveç) - “Pafos” (Kipr) cütünün qalibi ilə qarşılaşacaq. Lakin A.Bayramov hazırda bu barədə düşünmədiklərini söyləyib: “İnşallah hər oyuna maksimum dərəcədə yaxşı hazırlaşıb, bacardığımız qədər irəli getmək istəyirik. Lakin hazırda bütün diqqətimiz yalnız “Şerif”lə oyunlara yönəlib”.