Hər şey vəzifəyə çatana qədər idi, Sərxan bəy?

“Sərxan müəllim press-relizi hazırlayıb, onu təqdim edəcəklər”. Bu sözləri AFFA-nın prezidenti Rövşən Nəcəf mayın 13-də keçirilən AFFA İcraiyyə Komitəsinin iclasından sonra jurnalistlərə açıqlamasında demişdi. Rövşən bəyin anonsunu verdiyi, Sərxan müəllimin “hazırladığı” həmin press-reliz təxminən 4 saat sonra assosiasiyanın saytında yer almışdı... Sərxan Hacıyev isə mətbuat önünə çıxmamışdı. Halbuki istər sələfi Elxan Məmmədov, istər AFFA-nın icraçı vitse-prezidenti vəzifəsinə çatana kimi Sərxan Hacıyev özü ənənəvi olaraq İcraiyyə Komitəsinin iclaslarından sonra jurnalistlər önünə çıxırdı, sualları cavablandırırdı...

Bu gün səhər saatlarında AFFA İcraiyyə Komitəsinin növbəti iclası keçirildi. Komitənin üzvü, “Qarabağ”ın baş məşqçisi Qurban Qurbanov iclasdan ayrılarkən jurnalistlərin suallarını cavablandırıb. İclasda müzakirə olunan məsələlərlə bağlı suala Qurban bəy belə cavab verib: “Ümumi müzakirələr getdi. Ətraflı məlumatı yəqin ki, Sərxan müəllim verəcək”.

Təcrübəli mütəxəssis I Liqaya düşən “Qəbələ”yə AFFA tərəfindən yardım ediləcəyi barədə sualın cavabında da haqlı olaraq geniş danışmaq istəməyib və qeyd edib ki, “Maliyyə tərəfini Sərxan müəllim yəqin açıqlayar”.

Amma gəl ki, Sərxan Hacıyev yenə də mətbuat önünə çıxmayıb. İclası işıqlandırmaq üçün hadisə yerində olan həmkarlarımızın dediyinə görə, icraçı vitse-prezident əvvəlcə görünsə də, sonradan liftlə otağına qalxıb və mətbuat xidməti vasitəsi ilə xəbər göndərib ki, danışmayacaq.

Beləcə, AFFA-nın icraçı vitse-prezidenti 20 gün içində artıq ikinci dəfədir ki, mətbuat nümayəndələrinə qarşı hörmətsizlik edir. Hələ mən siyahını uzadıb, Sərxan bəyin minifutbol üzrə ölkə çempionatının mükafatlandırma mərasimində ona yaxınlaşan jurnalistlərə bu aralar danışmaq istəmədiyini söyləyib, cəmi 1 gün sonra “CBC Sport”un efirində görünməsini demirəm...

Nə baş verir, Sərxan bəy? Vəzifə sizi belə tez dəyişdi? Axı siz əvvəllər mətbuat nümayəndələrindən uzaq gəzməzdiz. Hər zaman sualları cavablandırırdınız. İndi nə olub? İcraiyyə Komitəsinin iclasından sonra brifinq keçirmək, jurnalistlərə 10-15 dəqiqə vaxt ayırmaq bu qədərmi çətindir? Belə çıxır ki, hər şey vəzifəyə çatana qədər idi? Artıq AFFA-nın icraçı vitse-prezidentisiniz deyə mətbuata qarşı hörmətsizlik edirsiniz?.. Jurnalistlər ki, keçmişdə müavini olduğunuz Elxan Məmmədov deyillər, niyə onlardan uzaq gəzirsiniz?

İbrahim CƏFƏROV