“Neftçi”: Hondanın insanlıq dərsindən “son zəng”ə qədər...

Feysbukun müsbət cəhətlərindən biri insanın yaddaşını təzələməsidir. “Воспоминания” bölməsində hər gün əvvəlki 3, 5, 10 ilin məhz həmin günündəki paylaşımları insana xatırladır. Mən də adətkaram, səhər gördüyüm ilk işlərdən biri feysbuk vasitəsi ilə “keçmişə səyahət etməkdir”.

Sosial şəbəkə bu gün Keysuke Hondanın “İnsanlıq dərsi”ni xatırlatdı. 3 il əvvəl “Neftçi”yə transfer olunan yapon ulduz təkcə “ağ-qaralar”ın “Qarabağ”ın hegemonluğuna son qoymasında rol oynamamışdı. Ulduz futbolçu həm də Ağdamı, İmarəti, Cümə məscidini, Allahverdi Bağırovun məzarını ziyarət etməsi, daha sonra isə uşaq sığınacağının sakinlərini sevindirməsi ilə necə böyük qəlbə sahib olduğunu göstərmişdi. Bu günə qədər Azərbaycana çox tanınmış futbolçu gəlib. Amma onlardan hansınınsa kimsəsiz uşaqlarla vaxt keçirdiyini xatırlamıram. Yapon ulduz isə artıq futbolçu kimi missiyasını başa vurduğu ölkədə həm də insanlığı ilə iz qoymağı bacarmışdı. Bu, bir tərəfdən Hondanın böyüklüyü idisə, digər tərəfdən də dünya səviyyəli ulduzu Azərbaycana gətirən “Neftçi”nin uğurlu fəaliyyətinin göstəricisi idi.

O “Neftçi” yuxarıda da xatırlatdığımız kimi, bircə illiyinə olsa belə, “Qarabağ”ı qızıl medalsız qoymağı bacarmışdı. O “Neftçi” Kamran Quliyevin, Samir Abbasovun,.. Rüstəm Allahverdiyevin “Neftçi”si idi. Bəs bugünkü “Neftçi” kimindir? Xalqın deyil, bu, dəqiqdir. “Forza” belə, uğursuzluğa, bərbad idarəçiliyə görə ara-sıra futbol sevgisindən imtina etmək məcburiyyətində qalır. Bəs bu “Neftçi” kimindir? “Qurbanlıq” seçilən Bojoviçin? Yox, məncə, adı “Neftçi”də, özü basketbolda olan Fərrux Mahmudovundur. Bəli, bu, kağız üzərində Fərrux Mahmudovun “Neftçi”sidir. Hər nə qədər “mən idman nəticələrinə cavabdeh deyiləm” desə də, faktiki klub geridə qalan mövsümdə Fərrux bəyin nəzarətində olub. Hər halda kluba gələrkən “Qarabağ”ın son mövsümdə “Neftçi”dən 19 xal geri qalmasını biabırçılıq hesab edən mən olmamışam. Amma sizin idarə etdiyiniz “Neftçi” “Qarabağ”dan geri qaldığı xal fərqini azaltmadı, əksinə, daha da artırdı (-27). Azarkeşlərlə görüşdə Bojoviçin məsuliyyətini üzərinə götürən də siz olmusuz. Bəs indi niyə susursunuz, Fərrux bəy? Niyə geridə qalan mövsümdəki fiasko barədə çıxıb mətbuat önündə danışmırsınız? Yaxud azarkeşlərə hesabat vermirsiniz? “Neftçi” “Sabah”la son oyundan sonra qapıdan çıxıb maşına getdiyiniz sürətlə meydanda hərəkət etsəydi, nəinki avrokuboklara, hətta Çempionlar Liqasına da gedərdi...

Bu gün “Neftçi”də “son zəng” günüdür. Bildiyim qədər Fərrux bəy üçün də, başqaları üçün də klubdakı son iş günüdür. Amma fərqli də getmək olardı. Həyatda heç birimiz səhvsiz, yaxud ideal deyilik. Hər birimizin səhvləri də olur, bacarmadığımız işlər də. Siz “Neftçi”dəki işinizin öhdəsindən gələ bilməsəniz də, ən azından Emin Mahmudov kimi, sosial şəbəkə hesabınızda azarkeşlərdən üzrxahlıq edə bilərdiniz...

İbrahim CƏFƏROV