Ayxan Abbasov: "Bizdə fitnes zalı kiçik olur, yeməkxana böyük"

"Xal qazanmaq istəyirdik. Buna köklənmişdik. İlk hissədə qol epizodlarından yararlana bilmədik. İkinci hissəyə yaxşı başladıq. Qollar vurduq. Buraxdığımız qollara üzülürəm. Çatışmayan cəhət asan qollar buraxmağımızdır. Çox da qol vurmuşuq. Son oyunda azarkeşlərimizi sevindirməliyik. Son 4 tura qədər avrokubok mübarizəsi apardıq. Növbəti mövsüm üçün hazırlaşacağıq. İlk “6-lıq” uğrunda mübarizə aparırıq".

 

Futbolxeber.az saytının məlumatına görə, bu sözləri "Turan Tovuz"un baş məşqçisi Ayxan Abbasov Azərbaycan Premyer Liqasının 35-ci turunda "Qarabağ"a 3:4 hesabı ilə uduzduqları oyundan sonra təşkil olunan mətbuat konfransında deyib. 

 

Daha sonra o, jurnalisltərin suallarını cavablandırıb:  

 

- Media tribunasından da, təkrardan da 4-cü qoldan öncə cərimə olduğu görünürdü. Siz olduğunuz yerdən də qayda pozuntusu görünürdü?

 

- Oyundan sonra hakimlikdən danışıqda deyirlər məşqçi bəhanə axtarır. Hakimdən soruşuram, deyir Beladjinin top əlinə dəyib. Ondan əvvəl də epizod var idi. O qayda pozuntusundan sonra qol buraxmağımız pis oldu. II dövrədə hakimliyə görə çox xallar itirmişik. Böyümək üçün bunu da keçməliyik.

 

- Bu mövsüm hakimlikdən kifayət qədər şikayət olub. Sizcə, bacarıqları budur, yoxsa hakimlər kimlərə işləyir?

 

- Kiməsə işləmək fikri mən tərəfdən ağır olar. Amma görsənən odur ki, bu yükü daşıya bilmirlər. Hamıya aid deyil, yaxşı hakimlərimiz var. Onlar da inkişaf etməlidir. Yükü daşıya biləcək hakimlər azdır. Çempionatda klub sayının artırılmamasının bir səbəb də hakim çatışmazlığı olub.

 

- Mövsümün sonuna 1 tur qalıb. Artıq özlüyünüzdə neçə nəfəri göndərəcəyinizin müəyyənləşdirmisiniz?

 

- Ötən mövsümdən dəyişiklik edirik. Keçən il hansı situasiyalardan keçdik, klub daxilindəkilər bilər. Ötən il orta sıralarda olduq. Bu il də belə idi. Bu futbolçularla yaxşı oyunlar keçirdik. Əksiklərimiz oldu. Bundan dərs götürdük. Böyük klub qurmaq istəyirik. Buna görə də düzgün seleksiya olmalıdır. Çalışacağıq 5-6 oyunçu transfer edək. Sonda fikirləşəcəm kimin gedəcəyin. Bu gün bir futbolçu var idi ki, fikrimi  müsbət yöndə dəyişdi. Amma gedən və gələnlər olacaq.

 

- Fərid Yusifli, Xəyal Nəcəfov və İsmayıl Zülfüqarlı yeni mövsümdə müqavilə ilə məxsus olduqları "Neftçi"yə qayıdacaqlar, yoxsa onları növbəti mövsümdə də sizin sərəncamınızda görəcəyik?

 

- Bu, bizi düşündürən məsələdir. Yerli futbolçu qıtlığı var. Yerli futbolçu baxımından digər klublara uduzuruq. Həmin rəqabəti udmaq üçün gərək 3-4 il medalçılar sırasına düşək. Fəridin istedadı var. Amma zədəsi imkan vermədi. İsmayıl da bu gün xəstə idi. Onları komandada istəyirik. “Neftçi” ilə danışıqlar aparacağıq. Gələcəkdə öz yetirməmizin olmasını istərdim.

 

- Niderlandda görüdüklərinizi Tovuzda, Azərbaycanda tətbiq etməyə nə qədər hazırıq?

 

- Orada hər klubun öz fəlsəfəsi var. Ondan kənara çıxmırlar. Əsas məqsədləri yetirmələrinin A komandada olmasıdır. Çalışırlar ki, akademiyadakı uşaqlar üzə çıxsın. Bizdə akademiyada oynayan uşaqlar nə qədər əsas komandaya çıxır? Bizim əsas meydança probemimiz var. Tək “Qəbələ”nin stadionları var. Biz isə bir stadionla keçinirik.

 

- De Souza sanki əvvəlki kimi çıxış etmir. Razısınız bu fikirlə? Razısınızsa, bu, nədən irəli gəlir?

 

- O cavandır. 3 qol vurduqdan sonra onu çox böyütdük. Bəlkə də “Qarabağ” adının yükü ona oynamağa imkan vermədi. O bu gün komandamız üçün böyük oyunçudur.

 

- Komandanızın avrokuboklara vəsiqə qazanması üçün nə mane oldu?

 

- Bizim avrokuboklara düşə bilməməyimiz faciə deyil. 3 illik məqsəd daha iddialı olmaq idi. İlk növbədə özünüz günahkarıq. Daha sonra hakim səhvləri. Bundan başqa bəzi oyunlarda kritik xal itkiləri baş verdi. Zədələr bizə mane oldu. Təcrübəmiz çatmadı. Geniş heyətimiz olmalıdır. Keçən ilkindən yaxşıyıq. Demək ki, düz yoldayıq. Geniş danışmaq olar. Bu gün bizdən də təcrübəli, büdcəli klublar çətinlik çəkir. Kim deyə bilərdi ki, “Qəbələ” çempionatı tərk edəcək? Biz istəyirik ki, Premyer Liqada qalaq. Vaxt lazımdır. Bizə işləmir deyənlər qərəzlidir. Özünən güvənən gəlsin sübut eləsin ki, iş yoxdur, ondan sonra məşqçiliyi buraxacam. 

 

- Ehtiramlı Quliyev bildirmişdi ki, Tovuz stadionunun ot örtüyünün təbii ilə əvəzlənməsi üçün AFFA-nın dəstəyinə ehtiyac var. Lakin assosiasiya maliyyə çatışmazlığını əsas gətirərək bundan imtina etdi. Bildiyimiz qədər Gəncə akademiyasında 2 təbii ot örtüklü meydançanın salınması üçün 3 milyon vəsait xərclənib. Necə olur, "Kəpəz"Ə pul tapılır "Turan Tovuz"a yox?

 

- Gəncənin akademiyası və məşq bazası yaxşıdır. Bizdə ilk iş idi deyə ola bilər tam ideal alınmadı. Biz bazalarda daha çox gözəlliyə önəm veririk. Məsələn, fitnes zalı kiçik olur, yeməkxana böyük. Halbuki ən vacib fitnes zalıdır. Biz fitnes zalını kiçik, yeməkxananı isə böyük edirik. Gəncənin bazası Tovuzda olsa, 5 ildən sonra milliyə yaxşı oyunçular verəcəyik.