AFFA İcraiyyə Komitəsinin üzvü: “Hələlik çempionatda 10 komanda qalmalıdır”

“Sabah”ın prezidenti, AFFA İcraiyyə Komitəsinin üzvü, Klublar Komitəsinin sədri Maqsud Adıgözəlovun Futbolxeber.az saytına müsahibəsi

- Son turda “Sabah” “Araz-Naxçıvan”ı məğlub etməklə Azərbaycan Premyer Liqasında ardıcıl dördüncü qələbəsini qazandı. Demək olar ki, komandanız artıq böhrandan çıxıb?

- Hələ nəsə demək çətindir. Çempionatda vəziyyət elədir ki, iddiasının qalıb-qalmamasından asılı olmayaraq bütün klublar motivasiya ilə oynayırlar. Hər bir komanda meydana çıxıb vuruşur. Qarşıda 3 ağır oyunumuz var.

- Sona 3 tur qalmış “Sabah” üçüncü pillədə qərarlaşıb. Avrokuboklara yollanmaq şansını necə dəyərləndirirsiniz?

- Təbii ki, məqsəd avrokuboklara yollanmaqdır. Çox istəyirik ki, hədəfə çataq. Bunun üçün son 3 turda komanda əlindən gələni edəcək.

- Bu yaxınlarda rəhbəri olduğunuz Klublar Komitəsinin növbəti iclası oldu. Orada müzakirə olunan məsələlərdən biri də Premyer Liqada komanda sayınının artırılmasıdır. Növbəti mövsüm üçün say artımı nə dərəcədə realdır?

- İlk növbədə onu deyə bilərəm ki, özünüz də bilirsiniz, biz yalnız məsləhət verə bilərik. Klublar Komitəsi qanunverici orqan deyil. Son iclasda bir çox məsələlər müzakirə olundu. Bəli, onlardan biri də Premyer Liqada klub sayınının artırılmasıdır. Hər kəs istəyər ki, çempionatda klub sayı artırılsın. Amma buna nə qədər hazırıq? Premyer Liqaya gələcək klubların infrastrukturu varmı? Bu suallar üzərində düşünmək lazımdır. Ümumilikdə təkliflər paketi hazırlamışıq və İcraiyyə Komitəsinə təqdim olunacaq.

- Siz həm də AFFA İcraiyyə Komitəsinin üzvüsünüz. Ona görə də say artımı ilə bağlı şəxsi fikriniz maraqlıdır... Məsələn, bu yaxınlarda Qurban Qurbanov bildirmişdi ki, eyni rəqiblə mövsüm ərzində 4 dəfə qarşılaşmaq yorucudur. Razılaşırsız?

- Əlbəttə, heç kim istəməz ki, eyni rəqiblə mövsüm ərzində çempionatda 4 dəfə qarşılaşsın. İlk növbədə reqlament məsələsini fikirləşmək lazımdır. Say artımı olsa, 3 dövrəli sistem olacaq, ya yox. Bu, çətin sualdır. Mən hesab edirəm ki, Premyer Liqaya I Liqa klublarının gəlişi sırf say artırmaq üçün olmamalıdır. Elə etmək lazımdır ki, çempionatın səviyyəsi aşağı düşməsin. Ona görə də indidən say artımının fayda verib-verməyəcəyini söyləmək çətindir. Bu barədə mütləq ciddi şəkildə düşünmək lazımdır. Mənim şəxsi fikrim odur ki, hələlik çempionatda 10 komanda qalmalıdır.

- Bəs legioner limiti ilə bağlı nə düşünürsünüz? Belə fikirlər səslənir ki, avrokuboklarda daha yaxşı çıxış etmək üçün “Qarabağ”, “Neftçi”, “Sabah” kimi iddialı kollektivlər limitin artırılmasının tərəfdarıdır...

- Əgər biz sırf “Sabah”dan danışırıqsa, onu deyə bilərəm ki, yaxşı akademiyamız var. Gözləyirik ki, yaxın gələcəkdə öz akademiyamızın uşaqları əsas komandaya cəlb olunsun. “Sabah”ın prezidenti kimi 7+4 limitini normal hesab edirəm. Bu məsələdə də şərtləri müzakirə etmək lazımdır. Əgər Premyer Liqada komanda sayı artsa, o zaman limit dəyişsə, daha yaxşı olar. Lakin indiki məqamda “7+4” “8+3”ə qəfildən çevrilməməlidir. Klublar Komitəsinin iclasında limitlə bağlı geniş müzakirə oldu. Bu məsələ ilə bağlı fikir ayrılığı var. Yadımdadır ki, 3 klub limitin artırılmasının lehinə, 3 klub əleyhinə idi. Qalan 4-ü isə bu məsələdə neytral mövqe tutdu.

- İcraiyyə Komitəsinin növbəti iclasının vaxtı bilinir?

- Dəqiq vaxt bilinmir. Lakin iclasın mayın ikinci həftəsində keçirilməsi nəzərdə tutulub.

- Ad açıqlanmasa da, millinin yeni baş məşqçisinin artıq müəyyənləşdiyi deyilir...

- Hələlik bizə konkret siyahı təqdim olunmayıb.

Fərəc ASLANOV