Sxadadze: “Zirə” həm yaxşı oynadı, həm də xarakter göstərdi”

"Hər şey göz qabağında idi. Layiq olan komanda qalib gəldi. Rəqib həm yaxşı oynadı, həm də xarakter göstərdi. "Zirə" hazırda yüksəliş dövründədir. Belə komanda yaratdığı üçün Rəşad Sadıqovu təbrik edirəm. Öz vəziyyətimizə isə təəssüflənirəm".

Futbolxeber.az saytının məlumatına görə, bu sözləri "Qəbələ"nin baş məşqçisi Kaxaber Sxadadze ölkə kubokunun yarımfinal mərhələsinin "Zirə" ilə cavab matçından (0:2) sonra keçirilmiş mətbuat konfransında deyib.

O, Premyer Liqadan düşməyin ləğv olunmasının mümkünlüyü barədə bunları söyləyib: “Deyiləcək sözüm yoxdur. Bu, mənim səlahiyyətlərimə daxil deyil. Mənim öz işim var. Belə durumda olmağımız əzabvericidir. Amma fakt faktlığında qalır. Görək nə baş verir”.

Gürcü mütəxəssis Feras Abu Akalla yolların ayrılmasına da aydınlıq gətirib: “Düşünmürəm ki, bu gün bizim problemimiz Ferasdır. Bundan daha qlobal problemlərimiz var. Səbəbini Ferasdan soruşun”.

Sxadadze bildirib ki, futbolçular mövsümün sonuna kimi öhdəliklərini yerinə yetirməlidirlər: “Mövsümün sonunu gözləyək. Klub rəhbərliyi ilə münasibətlərim yaxşıdır. Klubun bu vəziyyətdə olması həm bizi, həm də sizi məyus edir. Komanda sonuncu yerdədir, kubokda mübarizəni dayandırdı. Vəziyyət çətindir. Amma mənim həmişə devizim belə olub ki, komanda hansı vəziyyətdə olsa da, müqavilə şərtlərinə əməl etməlisən. Futbolçular da peşəkar olduqları üçün öz işlərini sona kimi görməlidir”.

“Qəbələ”nin çalışdırıcısı “Kəpəz”I deyil, özlərini düşündüklərini vurğulayıb: “Kəpəz”in baş məşqçisi düzgün qeyd edib ki, hər kəs özünü fikirləşməlidir. Mən də o fikirdəyəm”.