“Neftçi”də çalışmaq ehtimalım olsa da...”

Minifutbol üzrə Azərbaycan çempionu “Birbaşa Bakı”nın baş məşqçisi Dan-Aleks Mitunun Futbolxeber.az saytına müsahibəsi

- Minifutbol üzrə Azərbaycan çempionatının 1/4 final mərhələsinin ilk oyununda “İnter” üzərində 4:1 hesablı qələbə qazandınız. Görüşü necə dəyərləndirirsiniz?

- Əslində, nəticə daha çox yaxşı ola bilərdi. Qələbə qazandığımıza görə razıyam. Amma nəticədən heç də razı qalmadım.

- Bu üstünlük növbəti mərhələyə çıxmağınıza bəs edəcək?

- Xeyr, bu nəticə heç cürə bizə bəs edə bilməz. Çünki rəqibimiz təcrübəli oyunçuları olan yaxşı komandadır. Azərbaycan futbol millisinin keçmiş futbolçularıdır. Onlar necə oynamaq lazım olduğunu bilirlər. Cavab matçında hər şey əksinə dönə bilər. Biz sona qədər mübarizə aparacağıq.

- Konkret olaraq komandanızın oyununda hansı məqamlardan narazı qaldığınız?

- Əsas narazılığım odur ki, qol şanslarımızdan istifadə edə bilmədik. “İnter”i ən azından 10:1 hesabı ilə məğlub edə bilərik. Kifayət qədər hərəkət etmədik, öz keyfiyyətimizə uyğun topu çevirmədik.

- Komandanızdan fərqli olaraq “Zirə” pley-offun ilk matçında “Aznur”a 0:2 hesabı ilə uduzdu. Bu nəticə sizin üçün gözlənilməz oldu?

- Məncə, bu, hamı üçün sürpriz nəticə idi. Komandama da demişəm ki, pley-offda hər şey fərqli və çətin olacaq. Hər matçda istənilən nəticə qeydə alına bilər.

- “Zirə”nin çempionluq uğrunda mübarizədə əsas rəqibiniz olduğunu nəzərə alsaq, bu komandanın elə 1/4 finalda mübarizəni dayandırmasını istərdiniz?

- Mən sadəcə öz oyunumuzu fikirləşirəm.

- Mövsümün ilk yarısında “Zirə”yə uduzdunuz. Bəlkə finalda onlardan revanş almaq istəyirsiniz?

- Bütün bunları gələcəkdə görəcəyik. İndidən heç nə deyə bilmərəm. Çünki biz sadəcə birinci oyunu udmuşuq. Hələ ikinci görüşdə nələr olacağını heç kim deyə bilməz. 1/4 finalı adlamadan final haqda danışmaq doğru deyil.

- Böyük futbolda parlaq karyeranız olub, “Styaua”, “Anderlext” kimi klublarda forma geyinmisiniz. Bu gün Azərbaycanda, minifutbolda çalışırsınız. Təklif olsa, Azərbaycanda böyük futbolda çalışmaq istərdiniz?

- Azərbaycanda böyük futbolda işləmək şansım olub. Ancaq alınmadı. İstəyərdim ki, nə vaxtsa böyük futbolda işləyim. Mənim üçün maraqlıdır.

- Daha əvvəl həmvətənlərinizin orada çalışdığınızı nəzərə alsaq, yəqin ki, bu şans “Neftçi”də idi. Düzdür?

- Bəli.

- Bəs niyə alınmadı?

- Özüm də bilmirəm. Amma belə söz-söhbət olmuşdu.

İbrahim CƏFƏROV