Sərxan Hacıyev: “Ötən il Azərbaycan futbolu üçün uğurlarla yadda qaldı”

“Ötən il Azərbaycan futbolu üçün uğurlarla yadda qaldı. İlk növbədə uzun illərdən sonra Xankəndidə Azərbaycan kubokunun oyununun keçirilməsini qeyd etmək istərdim. Həmin matçı Prezident İlham Əliyev və Birinci vitse-prezident Mehriban xanım Əliyeva canlı izlədilər”.

Futbolxeber.az saytının məlumatına görə, bu sözləri AFFA-nın baş katibi Sərxan Hacıyev assosiasiyanın Hesabat-Seçki Konfransında çıxışı zamanı deyib.

O,“Qarabağ” Avropada yeni tarix yazdığını bildirib: “Qarabağ” Avroliqanın 1/8 final mərhələsinə vəsiqə qazandı. Məzmunlu, döyüşkən oyunla yadda qaldı. Azərbaycan futbol tarixində iz qoydu. Bu münasibətlə “Qarabağ” rəhbərliyini, futbolçuları, məşqçiləri, futbol ictimaiyyətimizi təbrik edirəm”.

S.Hacıyev geridə qalan 1 il ərzində qadın futbolunda da irəliləyiş olduğunu söyləyib: “Ötən mövsüm Azərbaycanda qadın futbolunda millimiz bizi sevindirdi. Qadınlardan ibarət millimiz yeni tarix yazdı, ilk dəfə qrup mərhələsində birinci yeri tutaraq B divizionuna vəsiqə qazandı. Bu da Azərbaycanda qadın futbolu üçün əlamətdar nəticə idi. Son illərdə AFFA tərəfindən müxtəlif tədbirlər də keçirilib. Sadəcə çox detallı danışıb, vaxtınızı almaq istəmirəm”.