Ağabala Ramazanov: “Ola bilər ki, gözləniləndən daha tez meydana qayıdım”

“Şükür Allaha, özümü hazırda yaxşı hiss edirəm. Hər şey əladır. Bir neçə gün əvvəl tam kontroldan keçdim. Səhhətimlə bağlı hər şey qaydasındadır”.

Futbolxeber.az saytına açıqlamasında bu sözləri uzun müddətdir yaşıl meydanlardan kənarda qalan Ağabala Ramazanov “Zirə” və “Səbail” arasında keçirilən Azərbaycan kubokunun 1/4 final mərhələsinin cavab oyununun fasiləsində deyib.

30 yaşlı futbolçu artıq məşqlərə başladığını bildirib: “Lakin hələlik həkimlər dediyi qaydada hazırlıq keçirəm. Yalnız fitnesdə çalışmağıma icazə var. Daha sonra, gücümü tam bərpa etdikdən sonra artıq yaşıl meydanda məşqlərə başlayacam. Bunun üçün bir qədər zaman lazımdır”.

A.Ramazanov bildirib ki, mövsüm başa çatmamış meydana qayıda bilər: “Mövsümü başa vurmağım hələ dəqiq deyil. Ola bilər ki, gözləniləndən daha tez meydana qayıdım. Bu, mümkündür. Təbii ki, tam hazır olsam”.

Kapitan hazırda komandasında bir qədər stabillik çatışmadığını söyləyib: “Komandamın oyununu kənardan izləmək çox çətindir. Təəssüf ki, zədəlilərimizin sayı çoxdur. İstəyərəm ki, mən olsam da, olmasam da, komandamız uğurlu nəticələr qazansın. Oyun haqda çox danışmağım düzgün çıxmaz. Qısaca yalnız onu deyə bilərəm ki, bir qədər sanki stabillik çatışmır. Məsələn, həftə sonu “Qarabağ”la oyunla müqayisədə bu gün “Zirə” ilə matçın ilk hissəsi arasında fərq çoxdur. İnanıram ki, Şahin müəllim bütün bunları yoluna qoyacaq”.

Fərəc ASLANOV