Leandro Andradeyə Rusiyanın 2 klubundan təklif

"Qarabağ"ın futbolçusu Leandro Andrade ilə Rusiyanın 2 klubu maraqlanır.

Futbolxeber.az-ın məlumatına görə, bu barədə yarımmüdafiəçinin agenti Uqo Kadjuda Rusiyanın sport24.ru saytına açıqlamasında bildirib. Söhbət Premyer Liqa təmsilçiləri "Rubin" və "Krasnodar"dan gedir: “Həqiqət budur ki, "Rubin" futbolçunun oyununu izləyir. Andrade ilə həmçinin "Krasnodar" da maraqlanır. Görək, bütün bunların nəticəsi necə olacaq”.

Daha əvvəl "Ajmedia" nəşri məlumat yayıb ki, "Rubin" 24 yaşlı Andradeyə görə "Qarabağ"a 1,5 milyon avro təzminat ödəməyə hazırdır. "Qarabağ" rəhbərliyi isə kluba belə bir təklifin daxil olmadığını bildirib.

Qeyd edək ki, Andradeyə Çinin "Şanxay Şenxua" klubundan təklif gəlsə də, tərəflər yekun razılığa gəlməyiblər. Ona görə də Andrade hələ ki, "Qarabağ"da karyerasını davam etdirir.