Brayan Moreno: “Məqsədim “Neftçi” ilə titullar qazanmaqdır”

"Neftçi"nin yeni transferi Brayan Moreno klubun televiziyasına açıqlama verib.

Futbolxeber.az saytının məlumatına görə, əvvəlcə o, ilk təəssüratlarını bölüşüb: "İlk təəssüratım odur ki, əvvəl tanımadığım futbolçular məni çox yaxşı qarşıladılar. Xüsusən də, Latın Amerikasından olanlar mənə komanda haqda yaxşı sözlər dedilər. Baş məşqçi ilə də aramızda görüş oldu. Ümid edirəm ki, çox tez bir zamanda komandaya uyğunlaşa biləcəyəm".

Moreno "Neftçi" və paytaxt Bakı haqqında isə bunları söyləyib: "Neftçi"dən təklif aldıqdan sonra həm klub, həm də Bakı şəhəri haqda məlumat toplamağa başladım. Şəkillərdən gördüyüm kimi, Bakı çox gözəl və böyük şəhərdir. Hələ ki, şəhəri gəzməyə və tanımağa vaxtım olmayıb. İlk fürsətdə şəhərlə tanış olacağam".

Kolumbiyalı forvard qarşısına qoyduğu məqsədlərdən də söz açıb: "Neftçi"də əsas məqsədlərimdən biri komanda ilə titullar qazanmaq və çempionatın bombardiri olmaqdır. Azarkeşlərə demək istəyirəm ki, hər zaman stadiona gələrək bizi dəstəkləsinlər. Onlar 12-ci oyunçudur. Bizə hər zaman dəstək verməyə davam etsinlər".

Qeyd edək ki, "Neftçi" yanvarın 21-də kolumbiyalı hücumçu ilə 1,5 illik müqavilə imzaladığını açıqlayıb.