Rafael Utziq: “Rəşad Sadıqov haqda ancaq müsbət fikirlər eşitmişəm”

“Zirə”nin yeni transferi Rafael Utziqin Futbolxeber.az saytına müsahibəsi

- “Zirə”yə keçidiniz necə alındı?

- İlk öncə onu deyim ki, Azərbaycana qayıtdığım üçün xoşbəxtəm. “Zirə”nin gələcək planları barədə mənə məlumat veriləndə eşitdiklərimdən razı qaldım və bu keçidə razılıq verdim.

- Azərbaycandan başqa təkliflər var idi?

- “Qəbələ” ilə ötən mövsüm Azərbaycan kubokunu qazandıqdan sonra təkliflər var idi. Lakin mən karyeramı başqa ölkədə davam etdirmək istəyirdim. Buna görə də Cənubi Koreyaya yollandım. İndi isə “Zirə”dən gələn təklifi qəbul etdim və burada olduğum üçün məmnunam.

- Cənubi Koreyadakı karyeranızın elə də uğurlu alınmadığını nəzərə alsaq, Azərbaycanda qalmadığınız üçün peşman deyilsiniz?

- Cənubi Koreyadakı futbolla Azərbaycandakı futbol fərqlidir. Burada daha çox topla oynamağa üstünlük verilir. Koreyada isə fiziki futbol ön plandadır. Bəli, oradakı çıxışım istədiyim kimi alınmadı. Hər bir futboçu daha çox oynamaq, daha çox şans qazanmaq istəyir. Koreyada az şans qazandığım üçün məmnun deyildim. Buna görə də ayrılmaq qərarına gəldim.

- “Qəbələ”də komanda yoldaşınız olmuş Ruan Renato yaydan “Zirə”də forma geyir. Bura gəlməmişdən öncə ondan hansısa məsləhət aldınız?

- “Qəbələ”də oynayanda təkcə Ruan deyil, Azərbaycanda çıxış edən bir çox braziliyalılarla münasibətimiz yaranmışdı. Burdan ayrılsam da, əlaqələrimiz davam edirdi. Ruan olmasın, olsun Riçard Almeyda, hansı ki o da “Zirə”də daha əvvəl forma geyib. Onlarla tez-tez əlaqə saxlayırdım. Həmişə həmyerlilərim “Zirə” haqda müsbət fikirlər səsləndiriblər. Bəli, təklifi qəbul etməyimdə onların da rolu olub.

- “Zirə”dəki hədəfləriniz nədən ibarətdir?

- Təbii ki, ilk növbədə hər bir futbolçu üçün komandasının hədəfləri öndə gəlir. Daha sonra fərdi hədəflər. Mövqeyimi nəzərə alsaq, qollar vurub, məhsuldar ötürmələrlə komandamın uğur qazanması üçün əlimdən gələni edəcəyəm.

- Təklifi qəbul etməyinizdə “Zirə”nin turnir cədvəlindəki hazırkı mövqeyi nə dərəcədə rol oynadı?

- “Zirə”nin təklifi mənim üçün maraqlı idi. Komandanın turnir cədvəlində yüksək pillədə olması keçidimdə elə də rol oynamadı. Onsuz da bilirəm ki, “Zirə”də həmişə keyfiyyətli futbolçular çıxış edib. Bu gün də komandada yaxşı oyunçular var. Bütün bu amilləri nəzərə alaraq bura gəldim.

- Baş məşqçi Rəşad Sadıqov haqda ilkin təəssüratlarınız necədir?

- Müxtəlif futbolçulardan Rəşad Sadıqovun özü, işi haqda müsbət fikirlər eşitmişəm. Bura gəlməkdə məqsədim ona kömək etməkdir. Sadıqovla birlikdə çalışacağım üçün çox məmnunam.

- Azərbaycan millisinin müdafiəçisi Anton Krivotsyuk da Cənubi Koreyada çıxış edir. Onunla rastlaşmısız?

- Xeyr, xatırlamıram.

- Sabiq klubunuz “Qəbələ”nin hazırda çempionatın son pilləsində olmasını necə şərh edərdiz?

- Komandanın bu vəziyyətdə olması məni məyus edir. “Qəbələ” ilə bağlı xoş xatirələrim var. Ötən il kuboka sahib çıxdıq, 2 dəfə avrokuboklara vəsiqə qazandıq. Ordan ayrılsam da, klub prezidenti, idarəçilərlə, oyunçularla bu gün də yaxşı münasibətim var. Amma indiki məqamda yalnız “Zirə”dəki işimə fokuslanmışam.

Fərəc ASLANOV