Rəşad Sadıqov: “Mən nəticəyə hesablanmış futbol oynatmıram”

"Gərgin matçın şahidi olduq. Qoldan sonra oyunun gedişatı dəyişdi. Meydanda taktiki savaş gedirdi. Ani diqqətsizlikdən qol buraxdıq. Bundan sonra üstünlük bizim tərəfə keçdi. Təəssüf ki, qol imkanlarından istifadə edə bilmədik. Bərabər səviyyəli oyun gedirdi. Qol vuran qalib gələcəkdi. Artıq bu oyun geridə qaldı, növbəti matça hazırlaşacağıq".

Futbolxeber.az saytının məlumatına görə, bu sözləri "Zirə"nin baş məşqçisi Rəşad Sadıqov Azərbaycan Premyer Liqasının 17-ci turunun "Turan Tovuz"la görüşündən sonra keçirilmiş mətbuat konfransında deyib.

O, qarşıda "Zirə"ni "Turan Tovuz"a qarşı gözləyən kubok matçı barədə də danışıb: “Qısa müddətdə eyni rəqiblə oynamaq heç bir komandaya xoş deyil. Kubokda ən çətin rəqib bizə və "Kəpəz"ə düşüb. Vaxtımız azdır. Rəqibin əhval-ruhiyyəsi yüksək olacaq. Ancaq biz oyuna köklənəcəyik. "Turan Tovuz" səfərdə daha yaxşı oynayır. Hər hansı üstünlüyümüz olmayacaq”.

Mütəxəssis Qismət Alıyev və Kamal Bayramovla oyundan sonra söhbət etməsinə belə aydınlıq gətirib: “Hər ikisi təcrübəli futbolçudur. Onların meydandakı davranışı bu yerə gəlib çıxmamalıdır”.

O, Qismətə hansısa cəza tətbiq edilməyəcəyini vurğulayıb: “Cəzalıq bir şey olmadı. Bir-birinə əl-qol atsaydılar, cəza verə bilərdik”.

Sadıqov Vladislav Kulaçın start heyətində meydana çıxmamasının aldığı zədə ilə bağlı olduğunu qeyd edib: “Həftəiçi planımız onu əsas heyətdə oynatmaq idi. Sadəcə, məşqlərin birində zədələndi. Buna görə də az oynadı”.

“Zirə”nin çalışdırıcısı bildirib ki, qışda hücum xəttini mütləq gücləndirməlidirlər: “Hücum xəttinə mütləq şəkildə transfer etməliyik. Başqa mövqeləri də gücləndirə bilərik”.

R.Sadıqov komandasının müdafiə futbolu oynaması fikri ilə razılaşmayıb: “Mən müdafiə futbolu oynatmıram. Ola bilər ki, "Sabah" və ya "Qarabağ"a qarşı müdafiə olunmuşuq. Digər rəqiblərlə matçlarda müdafiə futbolu oynamamışıq. Qol vura bilmirik, bu, başqa məsələdir. Bunun üzərində işləyirik. Göstərdiyimiz oyunla nəticə arasında balans düzgün deyil. Oyun 1-2 epizodla şərh olunmamalıdır. Mən nəticəyə hesablanmış futbol oynatmıram. Meydana çıxıb hücumçuların yerinə qol vura bilmərəm ki. Biz arxada ötürmə ilə oynamağı xoşlayırıq. Mənim oynatdığım futbol müdafiə futbolu kimi görünürsə, şərh etməyə sözüm yoxdur. İlk dəfədir ki, bu gün 3 mərkəz müdafiəçisi ilə oynadıq. Bu da rəqibə uyğun idi. İstəyərəm ki, epizodları təhılil edək, statistikaya baxaq. 17 oyunun 11-12-də hücum futbolu oynamışıq. Meydanda heyətimiz də hücumameyilli olub. Bu fikir bilirsiz haradan yaranıb? 1-ci yerdə gedirik deyə, daha baxımlı oyun gözləyirlər. Biz buna hazır deyilik. "Qarabağ", "Sabah"la hücum futbolu oynaya bilmərik. Mən müdafiə futbolu oynasaydım indi 8 yox, 3 qol buraxardıq. Qapıçılarımız, müdafiəçilərimiz etibarlı oynayır”.

Baş məşqçi Fuad Bayramovun az şans qazanmasının səbəbini rəqabətlə əlaqələndirib: “Həmin mövqedə Məqsəd İsayev oynayır. O da yaxşı mövsüm keçirmişdi. Məni üzən məqamlardan biridir. İstəyirəm ki, Fuada daha çox şans verim”.

O, komandasının “Turan Tovuz”la matçda məğlubiyyətə layiq olmadığını bildirib: “Rəqiblərlə xal fərqinin azalması normaldır. Yarış gedir. Dörd oyundur ki, qələbə qazanmırıq. Bu gün məğlubiyyətə layiq deyildik. Yaratdığımız qol epizodlarından istifadə edə bilmirik. Başımızın bəlası budur”.

Sonda Sadıqov “Neftçi”dən ayrılan Kenni Sayefin transfer siyahılarında olmadığını bildirib.