Toral Bayramov: “Komandamla qürur duyuram”

“Sevincimi ifadə etmək üçün söz tapa bilmirəm. Qələbədən də, nəticədən də çox məmnunuq”.

Futbolxeber.az saytının məlumatına görə, bu sözləri “Qarabağ”ın üzvü Toral Bayramov UEFA Avropa Liqasının pley-off mərhələsinə yüksəlmələri barədə danışarkən deyib.

O qeyd edib ki, “Hekken”lə görüşə çox ciddi hazırlaşıblar: “Bu oyunun əhəmiyyəti çox böyük idi. Ona görə də qarşılaşamaya çox ciddi hazırlaşmışdıq. Meydanda baş məşqçimizi tapşırıqlarını yerinə yetirdik. Şükürlər olsun ki, yekunda istəyimizə çatdıq. Azarkeşlərimizi, Azərbaycan xalqını sevindirə bildik. Komandamla qürur duyuram”.

Bayramov bildirib ki, pley-offdakı rəqibin adı komandası üçün ciddi əhəmiyyət kəsb etmir: “Hansı komanda olursa-olsun, öz oyunumuzdan əl çəkən deyilik. Rəqibin kimliyindən asılı olmayaraq məqsədimiz mərhələ adlamaq olacaq. Daha da irəli getmək istəyirik. Qismət... Hansı komanda rəqib olacaqsa, tam gücümüzlə oynamağa hazırıq”.

23 yaşlı futbolçu matçdan sonra paltardəyişmə otağında yaşananlardan da söz açıb: “Qurban müəllim bizi təbrik etdi. Tarixi uğura görə sevincini bizimlə bölüşdü. Hamımızı bağrına basdı. Bildirdi ki, komandamızla qürur duyur”.

Fərəc ASLANOV