Junior Martins: “Hər addımımda ondan nəsə öyrənməyə çalışıram”

“Kəpəz”in braziliyalı yarımmüdafiəçisi Junior Martinsin Futbolxeber.az saytına müsahibəsi

- "Kəpəz"in hazırkı vəziyyətini necə qiymətləndirirsiz?

- Hər kəsə məlumdur ki, hazırda komandamızın vəziyyəti ürəkaçan deyil. Bugünkü performansımız ən yaxşı ola bilməz. Turnir cədvəlində sonuncuyuq. Ona görə bu vəziyyəti heç cür qəbullanmaq olmur. Ən qısa zamanda bu durumdan çıxmalıyıq.

- Artıq indidən “Kəpəz”in Premyer Liqanı tərk etməyə ən real namizəd olduğu deyilir...

- Məncə, bu barədə danışmaq üçün hələ tezdir. Çünki bizi qarşıda çoxlu matçlar gözləyir. Bu həftə "Qəbələ" ilə oyunumuz var. Günü-gündən inkişaf edirik. Yalnız çempionatın sonundakı vəziyyət öz sözünü deyəcək. Çempionatda qalmaq uğrunda mübarizə "Kəpəz" və "Qəbələ" komandaları arasında gedəcək. Heyətimiz komandanı bu çətin situasiyadan çıxarmaq üçün əlindən gələni edir. Mövcud vəziyyəti anlayırıq.

- “Kəpəz”də ikinci mövsümü keçirisiz. Necə düşünürsüz, hazırkı “Kəpəz” daha güclüdür, yoxsa ötənilki?

- Müqayisə aparmaq istəməzdim. Hazırkı heyətimiz yaxşıdır. Komanda yoldaşlarımla gözəl münasibətim var. Hazırda əsas məqsədimiz hazırkı heyətlə birlikdə "Kəpəz"i bu çətin vəziyyətdən xilas etməkdir.

- Adil Şükürovun gəlişi “Kəpəz”də nəyi dəyişib?

- Yeni baş məşqçi Adil Şükürov çox yaxşı insandır. O, təcrübəli mütəxəssisdir. Hər addımımda ondan nəsə öyrənməyə çalışıram. Adil Şükürov bizə püxtələşməyə kömək edəcək və tezliklə cədvəldə daha üst pillələrdə olacağıq.

- Öz çıxışınız barədə nə deyə bilərsiniz?

- Hazırkı çıxışıma əsasən deyə bilərəm ki, "Kəpəz" aşağı diviziona düşməyəcək. Qarşıdakı matçlarda çox yaxşı performans sərgiləyəcəm. Burada yalnız qol vurmaq üçün mübarizə aparmıram, həm də öz üzərimdə işləyirəm. Əldə etdiyim güc ilə komandanı daha yaxşı yerə aparmaq istəyirəm. Həm də bu amil "Kəpəz"ə qol vurmağa kömək edir.

- Mövsümün sonunda müqaviləniz başa çatır. Artıq indidən "Kəpəz"dəki gələcək taleyini müəyyənləşdirmisiz, yoxsa hər şeyə mövsümün sonunda aydınlıq gələcək?

- Bəli, müqaviləm mövsümün sonunda başa çatacaq. Gələcək barədə nəsə deyə bilmərəm. Bu mövsümün sonuna kimi “Kəpəz”də qalacam. Lakin sonradan hər şey mümkündür.

- Sonda "Kəpəz azarkeşlərinə nə demək istərdiniz?

- Azarkeşlərimiz hər oyun bizə dəstək olurlar. Onlar bizim mübarizəmizdə sütun rolunu oynayırlar. Bizim qələbələrimizdə əsas pay sahibidirlər. Daim bizimlə birlikdə döyüşürlər. Onlarla birlikdə komandanı bu çətin vəziyyətdən çıxaracağıq.

Azad NURİYEV