“Qəbələ” - “Turan Tovuz”: 7-ci duel

Bu həftə Azərbaycan Premyer Liqasında XIV turun oyunları keçiriləcək.

Futbolxeber.az saytının məlumatına görə, milli komandaların matçları ilə əlaqədar yaranan fasilədən sonra baş tutacaq turda “Qəbələ” “Turan Tovuz”la qarşılaşacaq. Görüş ikinci oyun gününə təsadüf edəcək.

Qəbələ şəhər stadionundakı matç iki komanda arasında 7-ci duel olacaq. Bunadək 5 dəfə çempionat və 1 dəfə kubokda üz-üzə gələn rəqiblərin qarşılaşmalarında “qırmızı-qaralar” üstünlüyə malikdir.

İki qələbəsi olan “Qəbələ” 3 heç-heçə edib və yalnız bir dəfə uduzub. 8 qol vuran komanda 5 top buraxıb. Rafael Utziq və cari mövsümün I dövrəsində dubla imza atan Osama Xalayla bu görüşlərdə rəqib qapısına hamıdan çox - hərəyə 2 dəfə yol tapıb.

Çempionatdakı 5 qarşılaşmada rəqiblər hərəyə bir qələbə qazanıb. Üç görüşdə isə qalib müəyyənləşməyib. 6 qol vuran “Qəbələ” 5 top buraxıb.

Üçüncü dəfə rəqibini qonaq edəcək “qırmızı-qaralar” ev oyunlarında 1 heç-heçə edib və 1 dəfə məğlub olub. Öz meydanında bir qol vuran “Qəbələ” iki top buraxıb.

Xatırladaq ki, noyabrın 25-də Qəbələ şəhər stadionunda keçiriləcək “Qəbələ” - “Turan Tovuz” oyunu saat 16:00-da başlayacaq.