Adil Şükürov: “Təki məşqdə etdiklərimizi oyunda da təkrarlaya bilək”

“Kəpəz”in yeni baş məşqçisi Adil Şükürovun Futbolxeber.az saytına müsahibəsi

- Bu gün (söhbət dünən olub-red.) “Kəpəz”lə birinci məşqinizi keçdiz. İlkin təəssüratlarınız necədir?

- Ancaq müsbət fikirlər söyləmək istəyirəm. İnanıram ki, zəhmətimiz hədər getməyəcək. Bu cür əzmkarlıqla uğur qazanmaq şansımız artır. Təki məşqdə etdiklərimizi oyunda da təkrarlaya bilək. Uşaqların hər biri uğur üçün alışıb yanır.

- İlyas Qurbanovdan başqa, digər köməkçilərinizin kimliyi bilinir?

- Bəli, bilinir. Məşqçilər korpusunda İlyas  Qurbanov, Zaur Əsədov, analitik İlkin Verdiyev və qapıçılar üzrə məşqçi Elşad Əhmədov yer alacaq.

- Yəqin ki, bu mövsüm “Kəpəz”in oyunlarını izləmisiz. Sizcə, komandada əsas problem, çatışmayan nədir? Və yaxud belə deyək, uğur qazanmaq üçün Adil Şükürov “Kəpəz”də nələri dəyişməlidir?

- Azər müəllim yaxşı işlər görüb. Ancaq bəzən təcrübə, bəzən bəxt çatmayıb. İndiki halda psixoloji durumu yerinə gətirməli, uşaqlara özgüvəni geri qaytarmalıyıq.

- Milli komandaların oyunları ilə əlaqədar hazırda çempionatda yaranan fasilə müddətində yoxlama oyunu keçirməyi planlaşdırırsız?

- Bəli, bir qarşılaşma keçirmək istəyirik. Hazırda danışıqlar gedir. Rəqibin adı 1-2 günə müəyyənləşməlidir. 

- “Kəpəz” ev oyunlarını Gəncədə yox, Tovuzda keçirir. Bu məqam işinizi nə dərəcədə çətinləşdirəcək?

- Mən Gəncə üçün, Gəncə də mənim üçün yad deyil. Əlbəttə, könül istər ki, çılğın Gəncə fanatları önündə oynayaq. Ancaq bəhanə axtarmaq həyat prinsipimə ziddir.

- 2 illik müqaviləyə imza atdız. Şər deməsən, xeyir gəlməz, müqavilə müddətinə əsasən demək olar ki, komanda hətta Premyer Liqadakı yerini qorumasa belə, “Kəpəz”də qalacaqsız?

- Əlbəttə. Geriyə çəkilmək xasiyyətimə ziddir. Mən sonadək "Kəpəz" adı üçün mübarizə aparacam. Hansı Liqa olur-olsun, fikrimdə qətiyyətli olacam.

Azad NURİYEV