Samir Abasov: “Rəhbərliklə danışaq, “Neftçi”nin o videosunu hazırlayanlara da bonus verək”

"Oyuna kimi sizə vəziyyəti danışım. Necə edək, nə edək? Vəziyyət çox gərgin idi. Nəyə görə? Rəqib kimi bizim ehtiyat oyunçular skamyamız yoxdur. Oktavio, İssa, Ninaq və Kamran oyunu buraxırdı. Necə edəcəkdik? Məcburi Səbuhi vingeri oynatdıq. Roy da vinger oynadı. Başımızı sındırdıq”.

Futbolxeber.az saytının məlumatına görə, bu sözləri “Sumqayıt”ın baş məşqçisi Samir Abasov Azərbaycan Premyer Liqasının XIII turunda “Neftçi”ni səfərdə 2:1 hesabı ilə məğlub etdikləri oyundan sonra deyib.

Təcrübəli mütəxəssis matçdan öncə “Neftçi”nin sosial şəbəkə hesablarında paylaşılan videoya da toxunub: “Dünən gecə futbola baxıram, Almaniya Bundesliqasına. Birdən qrupa tanıyanlar video göndərir. "Neftçi" TV video düzəldib. Sübhənallah. Dedim bu nə yaxşıdır. Bu gün gəlsin, komandanı gör necə qızışdırıram. Bizə bonus veriləcək? "Neftçi" medianın böyüyü xanımdır? Sumqayıtda məndən oyundan sonra müsahibə alırdılar. İşıqlar söndü. Çıxıb gedə bilərdim. Qabiliyyətimi göstərdim. "Neftçi" TV-nin göstərdiyini bu gün futbolçularımız göstərdi. Bizim bonusdan həmin "Neftçi" medianın xanımına da pay düşür. Rəhbərliklə danışaq, onlara da bonus verək. Sağ olsunlar. "Sumqayıt"ın qələbəsində rolları oldu”.

O, "Neftçi" üzərində qazanılan qələbənin təəccüblü olmadığını qeyd edib: “Analizlər necə aparılır, mənim üçün müəmmalıdır. Son turlarda formada olan bizik. “Neftçi”ni analiz edən adam mən deyiləm. "Neftçi" bu oyuna kimi nələr edib, sualları verərsiz onlara. Bizim itkilərimiz var idi, "Neftçi" ev sahibidir, üstün tutulmalıydı. Ev sahibi avantajı da var idi, heyəti də genişdir. Dərin inciliklərə getsələr, bəlkə bu günləri şansları 50-50 saya bilərdilər. Amma mən də azarkeş kimi "Nefçti"yə üstünlük verərdim. Bu qələbə sürprizdir? Xeyr. Uduzduğumuz matçlarda da dominantlığımız olub. Bu gün layiqindən də çox layiq idik qələbəyə”.

“Matç başa çatandan sonra qələbə sevinci Mutuya cavab idi?” sualını Abasov belə cavablandırıb: “100 faiz. Cavabı verməliydik. Sumqayıtdakı matçda sakit durmuşdum. Mənə elə gəlir ki, "Neftçi"yə gələn baş məşqçilər "Sumqayıt"la oyuna elə hazırlayırlar ki... Oyunlarımız gərgin keçirdi. Mən amili də var burada. 90-cı illərdə dünya çempionatında məhəllə söhbətlər var idi, İrana demişdilər ki, kimə uduzursan uduz, ABŞ-a uduzma. Məncə, "Neftçi"də də belədir. Kimə uduzursan uduz, "Sumqayıt"a uduzma. Qol vurub, üstümüzə tullanırsansa, belə şeylər sizin də başınıza gələcək”.

O, “Neftçi” azarkeşlərinin "Samirin qədrini bilmədik" fikrinə belə münasibət bildirib: “Bu haqda fikir bildirməyim. Oyunumuza görə də alqışladılar. Bir qrup insan var ki, oyuna da önəm verir. "Neftçi" səhifələri var, bəlkə 100-dən 50-si söyəcək. Tərifləyənlər sağ olsunlar. Mən "Neftçi" üçün əlimdən gələni etmişəm, canımı da qoymuşam, bacardığımı da etmişəm, daha çoxunu da edə bilərdim. "Neftçi"nin, jurnalistlərin fikri belədir. Xoş qismət elədir ki, "Sumqayıt"a qayıtmışam, buradan qalib çıxırıq”.

O, "Neftçi" ilə oyunlara motivasiyasının xüsusi olması fikri ilə razılaşmayıb: “Sizə elə gəlir. Əsla elə deyil. "Qəbələ"ni udmaq istəmirdik? Oyundan-oyuna fərq var. Bu gün topla oynamayan komanda aqressiv görünməyə bilər. Topsuz komanda daha aqressiv görünür. "Neftçi"nin özəlliyi və böyüklüyü budur ki, bütün komandalar aqressiv oynayır. "Neftçi" flaqmanımız, tariximiz, canımızdır. "Xəzər Sumqayıt"ın vaxtında da intriqalar var idi. Onda mən yox idim axı. "Neftçi"yə qarşı hamı belə oynayacaq. Biz də qalib gəlmək istəyirik”.