22 Fevral 2024, Cümə axşamı
Kamil Zeynallı sərbəst buraxıldı
“Şansları bərabər qiymətləndirirəm”
UEFA-dan "Qarabağ" paylaşımı
"Neftçi" "Zirə"ni məğlub etdi

Ölkə futbolu

Yeqor Xvalko: “Meydana çıxırsansa, adın, ailən üçün mübarizə aparmalısan”

“Ardıcıl məğlubiyyətlərdən sonra çətin vəziyyətdə idik. Buna görə də toparlanmalıydıq. Psixoloji durumumuzu qaydaya salmağa çalışırdıq. 11 tur ərzində qələbə qazanmamışdıq. Nəhayət ki, bu uğursuz seriyaya son qoyduq”.

Futbolxeber.az saytına müsahibəsində bu sözləri “Kəpəz”in kapitanı Yeqor Xvalko Azərbaycan Premyer Liqasının XIII turunda “Araz-Naxçıvan”ı 1:0 hesabı ilə məğlub etdikləri oyun barədə danışarkən deyib.  

Belaruslu müdafiəçi bu qələbəni sensasiya adlandırmayıb: “Belə deməzdim. Oyun bərabər səviyyədə idi. Matç ilk qola kimi idi. Hesabı hansı komanda açsaydı, o da da qalib gələcəkdi. İlk hissədə hər iki tərəfin şansları var idi. Lakin nə biz fərqlənə bildik, nə də rəqib. Nəhayət ki, sona yaxın istəyimizə çatdıq. Vurduğumuz qol nəticəni müəyyənləşdirdi”.

Xvalko son turlar ardıcıl bəxtsizliklə üzləşdiklərini bildirib: “Əslində biz hər matçda nəticə qazanmaq üçün çalışırıq. Lakin bəzən gözlənilməz hallar yaşanır. Məsələn, “Turan Tovuz”la görüşdə pis çıxış etmirdik. Rəqib birinci hissənin sonuna yaxın fərqləndi. Bu cür qollar komandaya mənfi pis təsir edir. Fasilədən sonra matçın gedişatını dəyişmək istəyirdik. Amma ikinci 45 dəqiqə başlar-başlamaz rəqib növbəti qolu vurdu. Bundan sonra oyunun ipi əldən getdi. 0:2-dən sonra nəyisə dəyişməz mümkünsüz idi. Yaxud “Qarabağ”la oyun olsun. Komandanın gücü hər kəsə məlumdur. Sadəcə 1-ci dəqiqədə qapımızda qol gördük. Bu cür rəqiblə ilk dəqiqədə qapında qol görmək çox ağırdır”.

O, baş məşqçi Azər Məmmədovun “Kəpəz”dən gedişinə də toxunub: “Hamı başa düşür ki, nəticə yoxdur. Buna görə də Azər Məmmədov komandadan getdi. Təbii ki, baş məşqçinin gedişi pis təsir edir. Biz onun etimadığını doğrultmadıq. Sağollaşmaq hər zaman insanı məyus edir. Bu, xoş deyil. Lakin bu da futbolun bir hissəsidir. “Araz-Naxçıvan”la oyunu məhz onun üçün udmalıydıq”.

“Bəs növbəti oyunu kimin üçün udmalısız?” sualını Xvalko belə cavablandırıb: “İlk növbədə özümüz üçün. Sən meydana çıxırsansa, adın, ailən üçün mübarizə aparmalısan. Biz də əlimizdən gələni edəcəyik ki, bu qələbənin ardını gətirək”.

26 yaşlı futbolçu qeyd edib ki, çempionatda yaranan fasilə komandası üçün faydalı olacaq: “Bu matçdan sonra millinin oyunlarına görə çempionatda fasilə yaranacaq. Məncə, bu, “Kəpəz”in xeyrinə olacaq. Yeni baş məşqçi gələcək. Onun komandanı tanıması üçün zamana ehtiyac var. Eləcə də biz baş məşqçinin nə istədiyini bilməliyik. Odur ki, bu cür vəziyyətlərdə fasilə hər zaman faydalı olur. Məşqlərimizdə yükləmə çox olacaq. Növbəti matça qədər daha yaxşı durumda olacağıq”.

“Qarabağ”a ağır məğubiyyətdən sonra meydançanı tərk etməyən “Kəpəz”li futbolçular bir müddət tribunadakı azarkeşlərlə müzakirə apardılar. Xvalko bunun normal hal olduğunu söyləyib: “Əsas problem azarkeşlərlə müzakirə aparmaq deyil. Bu, normal haldır. Əsas problem aldığımız ağır məğlubiyyət idi. 1:7 nadir hesabdır. Psixoloji cəhətdən bu cür məğlubiyyətdən sonra toplarlanmaq çətindir. Sonuncu pillədə idik. Az qol vururuq və cəmi 1 qələbə qazanmışıq. Azarkeşlər bu cür gedişatdan narazı olmaqda tam haqlıdırlar. Biz onlara hörmət edirik”.

Belaruslu arxa xətt futbolçusu ev oyunlarını Gəncədə keçirməməyin komandanın çıxışına təsir edəcəyini vurğulayıb: “Gəncədə azarkeş daha çox olurdu. Üstəlik, öz evin, doğma divarlar da bəzən kömək olur. Yenə də Bakı ilə müqayisədə Tovuzda oynamaq məsafə baxımından daha yaxşıdır”.

O, sintetik meydanda çıxış etməkdə problem görmür: “Mən məsələyə fərqli yanaşıram. Sintetik meydanda qazon düz olur. Kələ-kötür olmur. Buna görə də sintetik qazonda oynamaq mənim üçün problem deyil”.  

İbrahim CƏFƏROV




Şərh yazılmayıb
ŞƏRH YAZ
Adınız, Soyadınız *  
E-mail    
Təhlükəsizlik kodu    
Kodu daxil edin *  







Arxiv

Fevral 2024
B.eÇ.aÇC.aCŞB
01 02 03 04
05 06 07 08 09 10 11
12 13 14 15 16 17 18
19 20 21 22 23 24 25
26 27 28 29