Qurban Qurbanov: “Bu cür oyunlardan çəkinmirəm”

“Çox güclü komandaya qarşı oynayacağıq. Təkcə nəticələri ilə yox, həm də baxımlı oyunu ilə də Bundesliqada liderdirlər. "Bayer Leverkuzen" çox bacarıqlı futbolçulardan ibarət komandadır”.

Futbolxeber.az saytının məlumatına görə, bu sözləri "Qarabağ"ın baş məşqçisi Avropa Liqasının qrup mərhələsinin 3-cü turunda "Bayer Leveruzen"lə (Almaniya) səfər oyunu öncəsi keçirilən mətbuat konfransında deyib.

Təcrübəli mütəxəssis rəqib həmkarı Xabi Alonsodan da söz açıb: “Rəqibin zəngin karyerası olan baş məşqçisi var. Hamımızın hörmət etdiyi bir şəxsiyyətdir. Xabi Alonso necə futbolçu olubsa, o cür də tələbkar, ciddi məşqçidir”.

O, komandasının matça hazır olduğunu bildirib: “Çalışacağıq ki, diqqətli olaq, yaxşı mübarizə aparaq. Futbolçularım hazırdırlar. Sabah hər biri meydanda ən yaxşı oyunlarını göstərəcəklər".

Qurbanov Leverkuzenin fərqli sistemlərdən yararlandığını vurğulayıb: "Hər rəqibə qarşı hazırlıq proqramı fərqlidir. "Bayer Leverkuzen" üç fərqli sistemlə oynayır. Bəzi rotasiyalar edirlər. Həddindən artıq ciddi olmalıyıq. Tək mən yox, futbolçular da oyunun gedişində bu komandanı yaxından tanımalıdırlar. Bacardığımız qədər oyunçuları rəqiblə tanış etdik. Bu cür komandarla oyunda motivasiya vermək həm asan olur, həm də çətin. Təcrübəmizə görə daha asan olacaq. Belə oyunlarda həmişə istəmişəm ki, futbolçular daha çox döyüşsün. Bacardığımız qədər motivasiya etmişik. İnanıram ki, səhvlər olsa da, futbolçular sona qədər meydanda oyun intizamını qoruyub-saxlaya biləcəklər”.

“Qarabağ”ın çalışdırıcısı sabahkı matçı üçün start heyətinin müəyyənləşdiyini vurğulayıb: "Demək olar ki, heyət hazırdır. Sadəcə oyunun gedişatında hansısa dəyişikliklər ola bilər".

O, Bundesliqa ən intizamlı oyun göstərən liqalardan biri olduğunu deyib: "Onlar üçün çempionat oyunu, avrokubok oyunu və ya zəif rəqibin fərqi yoxdur. Hər oyuna çox məsuliyyətli çıxırlar. Bütün sahələrdə alman intizamı var. Bu, məni narahat edən amillərdən biridir. Bunu əvvəlki rəqiblərlə oyunlarda da hiss etmişik. "Bayer Leverkuzen" tam fərqli komandadır. Burada ispan düşüncəsi var. Topla davranışlarını yəqin ki, yaxından baxmısız, izləmisiz. Çox sürətli, topla oynamağı bacaran komandadır. Rəqibin baş məşqçisini hamımız bir lider kimi tanıyırıq. Xabi Alonso futbolda ən böyük adlardan biridir. "Bayer Leverkuzen"in bu günə kimi olan nəticələri boşuna deyil. Biz belə oyunlarda ancaq böyüyürük. Hər işimizə real yanaşmalıyıq. Bu komandanın bacarığı, keyfiyyəti bizdən yuxarıdır. Son illərdəki təcrübəmiz bu komandaya qarşı,  daha sıx, kompakt oynamağa şərait yaradacaq. Böyükhesablı məğlubiyyət olsa belə, bu cür oyunlardan çəkinmirəm. Sabah ən yaxşı oyunlarımızdan biri olacağına şübhə etmirəm".