Azər Bağırov: “Uduzsaq da, futbolçularımın yanındayam”

“İlk növbədə şəhidlərimizə Allahdan rəhmət, yaxınlarına səbr diləyirəm. Bütöv Azərbaycan gözəldir. Oyuna gəldikdə, bu gün yaxşı oynadıq. Nəticə qazana bilməsək də, heyifsilənməməliyik”.

Futbolxeber.az saytının məlumatına görə, bu sözləri “Araz-Naxçıvan”ın baş məşqçisi Azər Bağırov Azərbaycan Premyer Liqasının VII turunda “Səbail”ə 0:1 hesabı ilə uduzduqları oyundan sonra deyib.

O, futbolçularının yanında olduğunu söyləyib: “Vəziyyəti təhlil edib, gələcəyə baxmalıyıq. Uduzsaq da, futbolçularımın yanındayam. Qol epizodları yaratsaq da, dəyərləndirə bilmədik”.

A.Bağırov komandasından narazı qalmadığını bildirib: “Bu gün həm müdafiədən topla çıxışımız, həm irəlidə oyunumuz pis alınmırdı. Düzdür, bəzən tələsirdik. Bu da oyunçuların təcrübəsizliyindəndir. 5 yerli futbolçu ilə oyuna başladıq. Onların çoxu uzun müddət Premyer Liqadan kənarda qalıblar. İnadkarlıqla mübarizə aparırlar. 90 faiz dediklərimi edirlər. Daha da artıracaqlar”.