31 yox, 3-də 1 - QEYD

Son vaxtlar ən çox müzakirə olunan klublardan biri, bəlkə də birincisi “Sumqayıt”dı. İstər mətbuatda, istərsə də sosial şəbəkələrdə. Halbuki bu komanda nə “Qarabağ” kimi avrokubokların qrup mərhələsində çıxış edir, nə “Neftçi” kimi ümidləri puç edir, nə də “Sabah” kimi milyonları göyə sovurur.

Ötən həftə sonu klubun keçmiş məşqçisi Elnur Çodarov ilə “Sumqayıt” arasında olan mübahisə üzrə İdman Arbitraj Məhkəməsi (CAS) qərarını açıqladı. Qərar açıqlanandan dərhal sonra CAS-ın qərarı ictimaiyyətə təhrif olunmuş şəkildə təqdim edildi. Düzdü, sonradan “Sumqayıt” klubu bəyanat yayaraq sübuta yetirdi ki, Elnur Çodarovun müraciətində ona təxminən 31 min manat ödənilməsini istəsə də, CAS apellyasiya şikayətini qismən təmin edib. Yəni “Sumqayıt" klubu müqavilənin pozulmasına görə Elnur Çodarova təxminən 11 manat kompensasiya ödəyəcək. CAS-ın qərarından da aydın olur ki, Çodarovun tələbinin yalnız üçdə bir hissəsi təmin edilib. Klub yuvarlaşdırsaq, 31 min yox, 11 min pul ödəcəyək. Buna görə “Sumqayıt”ı “Azərbaycan futbolunun qatili” kimi təqdim etməyə dəyərmi? Məgər “Sumqayıt” CAS-da uduzan ilk Azərbaycan klubudu? Bu məntiqlə onda gərək Mpenza məsələsinə görə “Neftçi” Azərbaycan futbolunun tarixindən silinərdi...

“Sumqayıt”ın büdcəsi aşağı-yuxarı məlumdu. Klub dövlətin ayırdığı 3 milyon və xırda-para sponsorluq müqavilələri ilə ayaqda durmağa çalışır. Fəaliyyətdə olduğu illərdə də Azərbaycan futbolu adına az iş görməyib. Gəl ki, bəzən kluba qarşı göstərilən münasibət təəssüf doğurur. Xüsusən də bu baxımdan klub prezidenti Riad Rəfiyev daha çox nişan alınır. Gah “Neftçi”nin prezidenti olmaq istəməsi”, gah “milyonları göyə sovurması” və s. və i.a. Nədənsə “Sumqayıt”a göstərilən “münasibət” məsələn, “Sabah”a qarşı göstərilmir. Komanda illərdi 10 milyonluq büdcə ilə fiaskoya uğrayır. Axır ki, 5 ildən sonra ilk dəfə avrokuboklara yüksəldilər, onda da tərifli məşqçinin səhvləri ucbatından avrokuboklarda çox irəli gedə bilmədilər. Əminəm ki, “Partizan” səfərində 2:0-lıq üstünlüyü əldən verib vətənə boynubükük dönən “Sabah” yox, “Sumqayıt” olsaydı, kluba qarşı tənqidlər bu gün belə səngimək bilmirdi. Gəl ki, “Sabah”a “Belqrad faciəsi”nə görə gözün üstündə qaşın var deyən olmadı. Sanki hər şey belə də olmalı idi...

Qəribədir ki, eyni münasibəti artıq AFFA İntizam Komitəsi də nümayiş etdirməyə başlayıb. “Neftçi” ilə oyunda alınan qırmızı vərəyə görə Murad Musayevə 2, Samir Abbasova isə “Zirə” ilə matçdakı hərəkətinə görə 5 oyunluq cəza vermək absurddu. İntizam Komitəsinin hansı “məntiq”lə belə qərar qəbul etməsini anlamaq mümkün deyil. Yaxud olsun “Qəbələ”nin məşqçisi Xaqani Məmmədov. Belə çıxır ki, AFFA İntizam Komitəsi “Sabah”dan qorxur, “gücünü” “Sumqayıt” və “Qəbələ”yə göstərir? Çünki Samir Abasov və Xaqani Məmmədovun cəzası 5 matçdısa, onda gərək Murad Musayevə 25 oyunluq cəza verilərdi...

Görünür, AFFA-dakı bəzi rəhbər şəxslərin kimlərləsə yaxınlaşması, onların dedikləri ilə oturub-durmaları barədə yayılan xəbərlər yalan deyilmiş...

İbrahim CƏFƏROV