Ağabala Ramazanov: “Bu, “Səbail”in maksimumu deyil” (MÜSAHİBƏ)

“Səbail”in hücumçusu Ağabala Ramazanovun Futbolxeber.az saytına müsahibəsi

- Premyer Liqanın VI turunda “Kəpəz” üzərində 3:0 hesablı qələbə qazandınız. Hesaba əsasən görüşün “Səbail” üçün asan keçdiyini söyləmək olar?

- Gəncə səfəri hamı üçün çətin olur. Bunu bildiyimiz üçün oyuna çox ciddi hazırlaşmışdıq. Rəqibin necə oynayacağını bilirdik. Qələbəyə baxmayaraq, görüşün asan keçdiyini söyləmək olmaz. Çünki Gəncədə bir xal qazanmaq belə çətindir. Yaxşı oyun sərgilədik və layiqli qələbə qazandıq.

- Demək olar ki, matçın taleyini ilk 15 dəqiqədə vurduğunuz 2 qol həll etdi?

- Oyundan əvvəl elə məqsədimiz erkən qol vurmaq idi. Buna  köklənmişdik, tez qol vurub qələbə qazanmaq istəyirdik. Bəli, erkən qollar işimizi asanlaşdırdı. Bu, fikirləşdiyimiz təzyiqli oyunun təzyiqini bəlkə də, aşağı saldı.

- Oyundan əvvəlki söhbətimizdə Şahin Diniyev qeyd etmişdi ki, “Səbail” yaxşı formada olarkən çempionatda fasilə yaranmasından bir qədər narahatdı. Lakin “Kəpəz”lə oyun göstərdi ki, çempionatdakı fasilə komandanın ziyanına işləməyib...

- Yox, fasilədə komandaya mənfi təsir etmədi. Biz futbolçular da çempionatda uzun fasilənin olmasını istəmirik. Tonusda olan vaxtı fasilənin yaranması bizim özümüzə də sərf etmir. Amma fasilədən maksimum yararlandıq. Şahin müəllimin kifayət qədər təcrübəsi var, fasilədən necə yararlanmaq lazım olduğunu bilir. Tonusdan düşmədik.

- Çempionata yaxşı başlamasaz da, hazırda ikinci pillədəsiz. 3 turdan sonra baş məşqçi nəyi dəyişdi ki, “Səbail” uğurlu seriya əldə etdi?

- Əslində, uduzduğumuz matçlarda da pis oynamırdıq, sadəcə bəxtimiz gətirmirdi. Belə deyək də, yaxşı oynayıb uduzmuşuq. Həmin matçlar gələcəyə ümid idi ki, tezliklə nəticə də qazanacağıq. “Kəpəz”ə 3:0 hesabı ilə qalib gəlsək də, bu, bizim maksimumuz deyil. Daha yaxşısını bacararıq. İndi artıq növbəti oyunları düşünməliyik. Gəncədəki qələbə bizim üçün burada bitdi.

- Növbəti turda “Araz-Naxçıvan”la görüşdə “Səbail”dən ardıcıl dördüncü qələbəni gözləmək olar?

- Hər şey öz əlimizdə olmasa da, şanslardan maksimum yararlanmaq lazımdır. Çalışacağıq ki, qələbə seriyasını davam etdirək.

- Ümumiyyətlə, qarşınıza konkret olaraq hansı hədəf qoyulub?

- Hədəfsiz futbolçu futbolçu deyil. Kollektivdə inanmıram elə oyunçu olsun ki, desin hansısa hədəf uğrunda oynamıram. Gücümüz hara çatırsa, o mövqe uğrunda sona qədər mübarizə aparacağıq. Amma qarşımızda konkret məqsəd yoxdur.

- Hər halda bu mövsüm “Səbail”in məqsədi keçənilki kimi Premyer Liqada qalmaq deyil...

- Xeyr. Açığı, biz keçən il də liqada qalmaq məqsədi ilə oynamırdıq. Onda da yaxşı yerlər uğrunda mübarizə aparmağa çalışırdıq. Sadəcə bəzən alınırdı, bəzən yox. Şükür Allaha bu mövsüm yaxşı nəticələr var, bunu qorumaq lazımdır.

- Keçən il Zaur Ramazanov da “Səbail”də idi. Ağabala bu gün qardaşının komandada yoxluğunu hiss edir?

- Yoxluq deyəndə ki, Zaur mənim qardaşımdır. Onsuz da, oyundan qabaq, oyundan sonra hər dəfə zəngləşirik. Oyunlarımızı müzakirə edirik. Daim əlaqədəyik.

İbrahim CƏFƏROV