“Türkiyəyə sübut etmək istəyirəm ki, bizdə də yaxşı qapıçılar var”

“Adana Demirspor”a yüksək səviyyədə oynaya bildiyimi sübut etmək üçün gedirəm”.

Futbolxeber.az saytına müsahibə bu sözləri milli komandamızın qapıçısı Şahruddin Məhəmmədəliyev deyib.

Türkiyənin “Adana Demirspor” klubuna transfer olunan təcrübəli qolkiper yeni klubuna iddialı yollanır: “Türkiyə Superliqası özünü göstərmək baxımından yaxşı şansdı. Türkiyəyə sübut etmək istəyirəm ki, bizdə də yaxşı futbolçular, yaxşı qapıçılar var”.   

O, “Qarabağ”ı üzləşdiyi təzyiqlər səbəbindən tərk etməsi barədə deyilənləri yaxına buraxmayıb: “Bəlkə də insanlar mənim təzyiqə dözə bilmədiyimi görmək istəyirlər. Lakin bu, boş söhbətdi. Mən təzyiqlərin öhdəsindən gəlirdim. Məşqçilər də mənə güvənirdilər. Odur ki, gedişimin təzyiqlə heç bir əlaqəsi yoxdur”.

Şahruddin bəzən inanılmaz təzyiqlə üzləşdiyini vurğulayıb: “Bəli, ağlasığmaz təzyiqlə üzləşirdim. Hesab edirəm ki, bu, anormaldı. Sən ölkənin ən yaxşı klubunda çıxış edirsən, millinin əsas qapıçısısan, lakin səhvlərdən sonra səni “dəfn etmək” istəyirlər. Məncə, bu, normal hal deyil. Bu məqam mənə təsir etsə də, “Qarabağ”ı tərk edəcək səviyyədə deyildi”.

Yığmamızın qolkiperi gedişi ilə “Qarabağ”ı pis vəziyyətdə qoymadığını söyləyib: “Artırmaq, daha da inkişaf etmək üçün “Adana Demirspor”a keçidim yaxşı şansdır. Komandamı da pis vəziyyətdə qoymadım. Çünki hazırda “Qarabağ”da 3 yaxşı qapıçı var”.

İbrahim CƏFƏROV