Vaqif Cavadov: “Milliyə inamsızlığı futbolçular özləri yaradıb”

“Belçika ilə oyunda millimizdən yaxşı nəticə gözləyirəm. Vaxtilə biz bu rəqibdən xal almışdıq. Baxmayaraq ki, o vaxt Belçika millisi daha güclü idi”.

Futbolxeber.az saytının müsahibəsində bu sözləri milli komandamızın sabiq üzvü Vaqif Cavadov deyib.

O, azarkeşlərin hazırkı milliyə inamsız yanaşmasına belə münasibət bildirib: “Bu inamsızlığı futbolçular özləri yaradıb. Azarkeşlər, futbol mediası milli komandadan nəticə gözləmirlər. Son nəticələr buna səbəbdir. Futbolçular özlərinə gəlməlidirlər. Uduzmaq olar, amma mübariz oyunla. Komandada istək olmalıdı”.

Cavadov klubunda oynamayan bəzi futbolçuların milliyə dəvət alması məsələsinə də toxunub: “Bizim vaxtımızda elə futbolçular var idi ki, zədədən təzə qayıdırdılar və milliyə çağırılırdılar. Mənim özümdə də belə hal yaşanıb. Zədədən qayıdan kimi millinin oyununa çıxmışam. Mən baş məşqçinin güvənini doğruldurdum. Eyni sözləri Kamran Ağayev barədə də deyə bilərəm. Baş məşqçidən də çox şey asılıdır. Seçimi onundur. Yaxşı olardı ki, oyun praktikası olanlar milliyə çağırılsın. Yox, klubunda heyətə düşə bilməyən futbolçu milliyə dəvət alırsa, öz oyunu ilə yığmaya layiq olduğunu sübut etməlidir. Biz vaxtilə bunu etmişik”.

Azad NURİYEV