İvan Brkiç: “Neftçi”də hücumçu kimi də oynamağa hazıram” (MÜSAHİBƏ)

“Neftçi”nin qapıçısı İvan Brkiçin Futbolxeber.az saytına müsahibəsi

- “Qəbələ” ilə matça ehtiyat oyunçular skamyasından başlasanız da, ikinci hissədə meydana çıxdız. Oyuna sonradan qoşulmaq çətin olmadı?

- Əvvəla onu deyim ki, Rzanın səhv etməyi məni çox məyus etdi. Amma gəncdi, indiki halda biz ona dəstək olmalıyıq. Təcrübəmə görə meydana sonradan daxil olmaq çətin olmadı. Son dəqiqəyə qədər oyuna köklənə bildim.

- “Sabah”la oyundan sonra sosial şəbəkədə hesabında paylaşım edərək Rzaya dəstək olduz. Bu dəfə necə, matç yekunlaşdıqdan sonra Rzaya yaxınlaşıb dəstəyinizi bildirdiz?

- Əlbəttə, oyundan sonra yanına gedib dəstək oldum. Rza çox yaxşı qapıçıdır. Lakin öz üzərində dayanmadan işləməlidi. Ona dedim ki, bu cür hallar mənim də başıma gəlib. Məyus olmasın, tam gücü ilə çalışmalara davam etsin.

- Son 2 turda ehtiyatda qalmağınız sizi narahat etmir?

- Bu qərar mənə təsir etmir. Burada hər kəs "Neftçi" üçün çalışır. Ehtiyatda olmağıma məşqçi qərar verir. Əgər oyunun son 1 dəqiqəsində də şans versələr, meydanda öz oyunumu göstərəcəm. Məşqçi məni hücumçu kimi meydana buraxarsa, hücumda da oynamağa hazıram.

- “Neftçi” çempionatdakı ilk qələbəsini IV turda qazandı. Bu, sizə də qəribə gəlir?

- Təbii ki, çempionata belə başlayacağımızı düşünməzdim. Amma belə alındı. İlk qələbəmizi yalnız “Qəbələ” ilə matçda əldə etdik. Artıq önümüzə baxmalıyıq. Daha da yaxşı çalışmalıyıq.

- Komandanın relsə düşməsi üçün nə qədər vaxt lazımdır?

- Əlbəttə, bizim vaxta ehtiyacımız var. Hər oyun daha da yaxşısını etməyə çalışırıq. Əlimdə hər hansısa sxem və ya formula yoxdur. Komandanın formaya nə vaxt düşəcəyi barədə dəqiq nəsə deyə bilmərəm. Məşqçilər heyəti ilə birlikdə bunun üçün var gücümüzlə çalışırıq. Hər dəfə qalib gələndə özgüvənimiz daha da artır.

- “Qəbələ” ilə Bakıdakı son oyun “Neftçi” üçün acınacaqlı yekunlaşmışdı. Kuboku əldən vermişdi. Bu məqam dünənki matçda motivasiyanızı daha da artırırdı?

- Biz hər oyunda qələbə qazanmaq istəyirik. Kubokun finalında aldığımız məğlubiyyəti xatırlamaq üçün xüsusi səbəbimiz yoxdur. Hər oyunun öz əhəmiyyəti var. Keçmişdəki oyunları düşünmürük.

- Çoxları düşünür ki, bu mövsüm son illərin ən maraqlı və gərgin Azərbaycan çempionatı olacaq. İlk 4 tur proqnozları doğruldur?

- Düşünürəm ki, çempionat daha da maraqlı olacaq. Komandalar çox güclü transferlər ediblər. Bu hal rəqabəti daha da artırır. Ötən ilə nisbətdə daha maraqlı çempionat olacaq.