“Neftçi” və “Sabah”la müqayisədə “Qarabağ”ın qələbə şansı daha yüksəkdi”

“Neftçi” və “Sabah”ın şansları demək olar ki, eynidir. Hər ikisinin rəqibləri olduqca təcrübəli, aqressiv və böyük azarkeş kütləsinə sahib "Partizan" və "Beşiktaş" komandalarıdır”.

Futbolxeber.az saytına müsahibəsində bu sözləri futbol mütəxəssis Aslan Kərimov deyib.

UEFA Konfrans Liqasındakı təmsilçilərimizin şansını dəyərləndirən veteran futbolçu qeyd edib ki, rəqib komandaların heyətində ulduz futbolçuların olması “Neftçi” və “Sabah”ın işini çətinləşdirir: “Təbii ki, bu rəqiblərə qarşı oynayıb qalib gəlmək mümkündür. Düşünürəm ki, istənilən halda komandalarımıza çətin olacaq. İstər "Beşiktaş", istərsə də "Partizan"ın heyəti hər zaman ulduz oyunçularla fərqlənib. Bu məqam "Sabah" və "Neftçi"nin şanslarını aşağı endirir. Xüsusilə "Neftçi"nin ölkə çempionatına məğlubiyyətlə başlaması motivasiyanı da aşağı sala bilər. "Sabah", "Qarabağ" və ya "Zirə"yə məğlub olmağı bağışlamaq olardı, amma "Kəpəz" kimi aşağı büdcəli bir komanda ilə oyunda məğlubiyyət oyunçuların motivasiyasına təsir edə bilər. Belə hazırlıq növbəti oyunlarda komandaya çətinlik yarada bilər. Əlavə olaraq, "Neftçi"nin "Beşiktaş" qarşısında hansı hücumçu ilə oynayacağı hələ də sual altındadır. İlk olaraq Ozobiçin adı çəkildi. Mənə görə, Ozobiç tipik sivri ucda oynayan hücumçu deyil. O, təcrübəli, hücumçu arxasında oynamağı bacaran pleymeykerdir. Bu baxımdan komandamızın işi bir qədər çətin olacaq. "Sabah"ın rəqibi "Partizan" aqressiv, hücum potensialına malik komandadır. Latviya komandası ilə oyunda "Sabah" müdafiədə boşluqlar verirdi. Düşünürəm ki, belə boşluqları "Partizan" bağışlamayacaq. "Sabah"ın da işi nisbətən bir qədər çətin olacaq”.

“Qarabağ”ın HİK-lə oyununa da toxunan A.Kərimov vurğulayıb ki, digər 2 təmsilçimizlə müqayisədə, Ağdam klubunun şansları daha yüksəkdir: “3 komanda arasında "Qarabağ"ın şansları daha yüksəkdir. Ağdam təmsilçisinin rəqibi HİK digərlərinə nisbətdə daha zəifdir. "Qarabağ" “Zirə” ilə oyunda məğlub olsa da, qeyd edim ki, həmin matçda əsas heyəti oynatmamışdı. Komandanın 70 faizi ehtiyatda idi. Oyunun sonlarında əsas heyət oyunçuları meydana daxil oldu”.

Azad NURİYEV