Mutu: "Qələbəyə də layiq deyildik, məğlubiyyətə də"

"Komanda yorğun idi. Hələ ki, üç gündən bir oynamağa tam hazır deyilik. İlk hissədə şanslarımızı dəyərləndirə bilmədik. Əvəzində böyük səhv etdik və bu, penalti ilə nəticələndi. Rəqib də bizi cəzalandırdı".

Futbolxeber.az saytının məlumatına görə, bunu "Neftçi"nin baş məşqçisi Adrian Mutu Azərbaycan Premyer Liqasının ilk turunda "Kəpəz"ə 0:1 hesabı ilə uduzduqları oyundan sonra deyib.

Rumın mütəxəssis futbolçuların fikirlərinin "Beşiktaş"la oyunda olması fikri ilə razılaşmayıb: "Beşiktaş"la matçda da ağlımızdan yalnız qələbə keçir. Gəncəyə qalibiyyət üçün gəlmişdik. Məğlubiyyətə də, qələbəyə də layiq deyildik. Heç-heçə ədalətli nəticə olardı. Amma istənilən halda, "Kəpəz"i qələbə münasibəti ilə təbrik edirəm".

O, mövsümün çətin keçəcəyini bildirib: "Bayaq dediyim kimi, üç gündən bir oynamaq çətindir. Xüsusən də bu cür isti havada. Çempionata qaldıqda, bəli, çətin olacağı gözləniləndir".

O, "Qalatasaray"ın futbolçusu Olimpiu Morutanın adının "Neftçi" ilə hallanmasına xəbərinə belə münasibət bildirib: "Bu barədə məlumat yoxdur".