Fərid Nəbiyev: “Həmin epizod bizim üçün siqnal idi” (MÜSAHİBƏ)

“Turan Tovuz”un üzvü Fərid Nəbiyev Futbolxeber.az saytına müsahibə verib.

- Mövsümə uğurlu start verdiz. “Araz-Naxçıvan” üzərində qazanılan 3:0 hesablı qələbə barədə nə deyə bilərsən?

- Çempionatın ilk oyunu həmişə ağır keçir. Hər nə qədər yaxşı hazırlıq keçsən də, birinci matçda çətinlik olur. "Araz-Naxçıvan"la matç da istisna olmadı. Ümumilikdə gərgin oyun oldu. Lakin əsas odur ki, çempionata qələbə ilə başladıq. Bu, çox vacib idi.

- Matçın əvvəlində “Araz-Naxçıvan” daha üstün görünürdü. Səncə, bu, nədən irəli gəlirdi?

- Bəlkə də bir qədər gərginlik, yaxud ilk oyun olduğu üçün həyəcan var idi. Üstəlik, küləyə qarşı oynayırdıq. Ona görə də bir qədər çətinliklə üzləşdik. Amma şükür ki, hər şey yaxşı qurtardı.

- İkinci hissənin əvvəlində rəqibin bir topu dirəkdən döndü. Demək olar ki, bu məqam “Turan Tovuz”u oyatdı? Çünki bundan sonra daha yaxşı oynamağa başladız və ardıcıl qollar gəldi...

- Bəli, həmin epizod bizim üçün siqnal idi. Ondan sonra daha diqqətli oynamağa başladıq. Çox şükür ki, qollar ardıcıl gəldi.

- Fasilədə Ayxan Abbasov sizlərə nə dedi? Taktiki cəhətdən hansısa xüsusi bir dəyişiklik etdimi?

- Xeyr, hər hansı bir dəyişiklik olmadı. Sadəcə səbrli olmağımızı istədi. Dedi ki, öz oyununuzu oynayın, qol gələcək.

- Əvvəldən oyunun Tovuzda keçirilməsi gözlənilirdi. Lakin matça bir neçə gün qalmış yer dəyişdirildi. Bu məqam oyununuza nə dərəcədə təsir elədi?

- Biz də istəyirdik ki, Tovuzda, öz azarkeşlərimiz qarşısında oynayaq. Sonradan yerdəyişmə oldu. Amma səfərdə oynamağımız hiss olunmadı. Azarkeşlərimiz bizə çox gözəl dəstək oldular.

- Bu, “Turan Tovuz”da rəsmi debütun idi. Qol vurmasan da, meydanda fəallığın hiss olunurdu. Öz çıxışından razı qaldın?

- Tam razı qalmadım. Bir tərəfdən hələ tam hazır deyiləm, digər tərəfdən də ilk oyun idi deyə müəyyən çətinliklər var idi. Yeni komandaya uyğunlaşma prosesi davam edir. İnanıram ki, oyundan oyuna daha da yaxşı formaya düşüb, komandama çox kömək edəcəm.

- Növbəti turda “Qarabağ”la qarşılaşacaqsınız. Həmin oyundan nə gözləyirsən? "Qarabağ"ın həfrə arası HİK-lə oyununun olması "Turan Tovuz" üçün üstünlük sayıla bilər?

- "Qarabağ"ın heyəti genişdi. Ona görə düşünmürəm ki, onlar üçün hər hansı problem olsun. Rəqib hər nə qədər güclü olsa da, çalışacağıq ki, səfərdən sərfəli nəticə ilə qayıdaq.

İbrahim CƏFƏROV