“Avrokuboklara şans həmişə var”

"Səbail"in baş məşqçisi Şahin Diniyev Futbolxeber.az saytına müsahibə verib.

 Artıq bu gün “Səbail” yeni mövsümdə ilk matçına çıxacaq. Komandanızın yeni mövsüm üçün hədəfləri nədir?

- Əvvəla bütün futbol azarkeşlərini, futbol ictimaiyyətini, futbolçuları, məşqçiləri, texniki işçiləri, idarə heyətini təbrik edirəm və hər birinə uğurlar arzulayıram. Düşünürəm ki, bu mövsüm gözəl bir çempionat olacaq. Görünən odur ki, komandaların hər biri güclənib. Bu baxımdan rəqabət dolu bir çempionat gözləyirəm. Hədəflər əvvəldən açıqlanıb. İlk hədəf altılığa düşmək və bundan sonra vəziyyətə əsasən addımlamaqdır.

- “Səbail” yay fasiləsində yeni mövsümə lazımi dərəcədə hazırlaşa bilib?

- Yay fasiləsində hazırlığımız rəhbərlik tərəfindən yüksək səviyyədə təşkil edildi. İstədiklərimizi ala bildik. Həm təlim-məşq toplanışının keyfiyyəti, həm də yeni futbolçuların komandaya adaptasiya olması üçün yaxşı imkan əldə etdik.

- Bu gün “Sumqayıt”ı qəbul edəcəksiniz. Komanda nə dərəcədə ilk matça hazırdır?

- İlk oyun hamı üçün çətindir. "Sumqayıt" izləmişik, təhlil etmişik. Yaxşı məşqçi və sistemə malik bir təşkilatlanmış komandadır. Bizi çətin bir oyun gözləyir. Hazırlıq dövrü ilə çempionat müddəti arasında xeyli fərqlər var. Komandanın nə qədər hazır olduğunu demək olmaz.

- Yay transfer pəncərəsi zamanı 7 legionerlə gücləndiz. Onların sənədləşməsi ilə bağlı hər hansı bir problem yoxdu? Onlara bugünkü matçda şans verəcəksinizmi?

- Bəli, 7 legionerimiz var. Onlardan yalnız biri Adi Mehremiç komandaya bir qədər gec qoşulub. Qalanları bizlə birlikdə ilk gündən təlim-məşq toplantısında iştirak edib. Bu baxımdan ola bilər ki, Mehremiç müəyyən müddət əsas heyətdən kənarda qalıb, öz zamanını gözləsin.

- Ümumiyyətlə, geridə qalan müddətdə yeni transferlər sizi qane edir?

- Əlbəttə, yeni transferləri məni qane edir. Bu məsələlərdə həssasıq. Legionerlərin nə qədər yaxşı olub-olmaması hələ ki, qaranlıqdır. Çünki müəyyən müddət iş başında görməyənə kimi əmin olmursan. Ona görə cəlb etdiyimiz oyunçular arasında uğursuz çıxış edənlər də ola bilər. Əgər yeni legionerin 20-30 faizi zəif çıxış edərsə, bu, nisbətdə yaxşı olar. Amma yeni transferlərin 50 faizdən çoxu müsbət nəticə verməzsə, artıq bu, uğursuz seçim olacaq. Biz buna həssas yanaşırıq. Yenə də onlar güvənirəm və bütün komandaya uğurlar arzu edirəm.

- Azarkeşlər bu mövsüm daha güclü “Səbail” görə biləcəklər?

- Bu mövsüm ötən il yaşadıqlarımızın təkrarlanmasını istəmirik. Çalışacağıq ki, azarkeşlər daha güclü "Səbail" görsünlər.

- Avrokuboklar şansını necə dəyərləndirirsiniz?

- Avrokuboklara şans həmişə var. Bayaq dediyim kimi, çətin mövsüm olacaq, güclü komandalara qarşı oynayacağıq. İstək var, ancaq reallıq buna nə dərəcədə imkan verir, bunu zaman göstərəcək.

Azad NURİYEV