Ayxan Abbasov: “Bu, son illərin ən gərgin mövsümü olacaq” (MÜSAHİBƏ)

“Turan Tovuz”un baş məşqçisi Ayxan Abbasovun Futbolxeber.az saytına müsahibəsi

- “Araz Naxçıvan”la oyunun hazırlığını artıq başa vurdunuz (söhbət dünən olub-red). Mövsümün açılış matçı ilə bağlı fikirləriniz necədi?

- Ümumən ilk oyunlar həmişə çətin keçir. Üstəlik, komandada yeni futbolçular var. Onların da uyğunlaşması həqiqətən də vaxt aparır. Maksimum çalışmışıq ki, komandanı hazır edək. Əlimizdən gələni edəcəyik ki, mövsümə uğurlu start verək. Çətin oyun olacaq. “Araz Naxçıvan” debütant olsa da, heyətlərində xeyli sayda yeni oyunçular var. Qarşılaşma çox gərgin keçəcək.

- Heyətlə bağlı hər hansı bir probleminiz yoxdu?

- Heyətimizdə bir itki var. Paçu “Araz Naxçıvan”la matçda meydana çıxa bilməyəcək. Türkiyə toplanışındakı son yoxlama oyununda zədələnən braziliyalı forvard bu gün komandaya kömək edə bilməyəcək. Hazırda yüngül qaçışla kifayətlənir. Hələlik onun yaşıl meydana nə vaxt qayıdacağı məlum deyil. Onun zədələnməsi bir az planlarımızı pozdu. Amma qalan oyunçularla bağlı hər şey qaydasındadı.

- Bəzən yeni legionerlərin transfer vərəqələri yubanır və sifariş etmək mümkün olur. Sizdə bu tip problem yoxdu?

- Xeyr, sənədlə bağlı heç bir problem yoxdu. Yeni transferlərin hamısını sifariş etmişik.

- Mövsüm start götürmək üzrə olsa da, transfer pəncərəsi hələ qapanmayıb. Yenə də transfer etmək fikriniz var, yoxsa artıq heyəti tam komplektləşdirmisiz?

- Daha bir legioner komandaya qoşulmalıdı. Onun yolunu gözləyirik. Qarşıdakı günlərdə düşərgəyə qoşulacaq. Bu, nigeriyalı Amos Beji Entonidir.

- Təqvimə əsasən ilk turda Tovuzda oynamalı idiz. Lakin sonradan stadionda aparılan işlərlə bağlı qarşılaşmanın yeri dəyişdirildi. Bu məqam planlarınızı nə dərəcədə pozdu?

- Təbii ki, istərdik ki, öz azarkeşlərimiz qarşısında oynayaq. Lakin bu dəyişiklik səbəbsiz deyil. Klubun gördüyü iş qiymətləndirilməlidi. Hazırda stadionda bu günə qədər olmayan işıqlandırma sistemi qurulur. Mən buna görə sevinirəm. Tovuzda projektorla altında oynamağı səbirsizliklə gözləyirəm.

- Yeni mövsümün startı ərəfəsində tovuzlu azarkeşlərə nə demək istərdiz?

- Azarkeşlərimiz “Turan Tovuz”u sevirlər. Biz inkişaf etməkdə olan klubuq. Buna görə də bir qədər vaxt lazımdı, səbrli olmalıyıq. Çox istərdim ki, azarkeşlərimiz komandanı uğurlu günündə də, uğursuz günündə də tək buraxmasınlar. Daim yanımızda olsunlar. Biz də onları sevindirmək üçün əlimizdən gələni edəcəyik. Çempionat uzun marafondu. İnanıram ki, hər şey yaxşı olacaq, sadəcə səbrli olaq.

- Və sonda yeni mövsümdən gözləntiləriniz...

- Bu, son illərin ən gərgin mövsümü olacaq. Bütün komandalar iddialıdılar. Demək olar ki, komandaların hamısı heyətini gücləndirib. Ona görə də bizi çox gərgin çempionat gözləyir.

Fərəc ASLANOV