“Rakuv”un baş məşqçisi: “Bakıya qələbə üçün gəlmişik”

"Bu gün burada olmağımıza görə şadıq. Bu, iki eyni gücə malik komandanın qarşıdurmasıdır. Həm “Qarabağ”, həm də “Rakuv” özünəməxsus oyun stilinə malikdir”.

Futbolxeber.az saytının məlumatına görə, bunu “Rakov”un baş məşqçisi David Şvarqa sabah Çempionlar Liqasının ikinci təsnifat mərhələsinin cavab oyunu çərçivəsində Bakıda “Qarabağ”a qarşı keçirəcəkləri qarşılaşma barədə danışarkən deyib.

32 yaşlı məşqçi oyunöncəsi mətbuat konfransında sabahkı matça ciddi hazırlaşdıqlarını bildirib: “İlk matçda “Qarabağ”ı daha yaxından tanıdıq. Rəqibin potensialını bildik. Cavab görüşünə yetərincə hazırlaşmışıq və sabah  "Rakuv"un oyununu göstərməyə hazırıq. Hansı ki, biz bunu hər yerdə göstərmişik".

O, Bakıya qələbə üçün gəldiklərini söyləyib: “Əlbəttə ki, Bakıya gəlməyimizin məqsədi qələbə qazanmaqdır. Təbii ki, ilk matça bir qol fərqi ilə qalib gəlmişik. Amma sabahkı matçda da qələbə qazanmağa çalışacağıq”.

O, oyunsonrası penaltilər seriyasına hazırlaşmaları barədə sualı belə cavablandırıb: “Çempionlar Liqasındanın bütün mərhələlərində olduğu kimi, sabahkı matç üçün penaltilər seriyasına hazırlaşırıq. Sabahkı oyunun gedişatı bunu göstərəcək. Biz ümumiyyətlə, bu cür matçlara kompleksli yanaşırıq. Təbii ki, penaltilərə də hazırlaşırıq. Qapıçımızdan çox şey asılıdır”.

Şvarqa ilk oyundan sonra səsləndirdiyi “Üzümü turşudub "Qarabağ"a tərəf baxırdım ki, onları qorxudum" fikrinə belə münasibət bildirib: “Bu, mənim sifətimdir. Mən heç kimi qorxutmağa çalışmamışdım”.

“Rakuv”un çalışdırıcısı “Qarabağ”ın qapıçısı Şahruddin Məhəmmədəliyevin səhvə yol verməsinin onlar üçün psixoloji üstünlük olub-olmaması barədə da danışıb: “Bu, bizimlə əlaqəli deyil. Bizim üçün problem yoxdu. İstənilən halda, oyuna hazırlaşırıq. Əlbəttə ki, hər bir matça hazırlaşanda rəqibin zəif nöqtələrini özümüz üçün qeyd edirik. Amma yenə də, əsas diqqətimizi buna yox, öz oyunumuza yönəldirik”.

Polşalı məşqçi ötən il “Qarabağ” digər Polşa təmsilçisi “Lex”ə qarşı keçirdiyi matçı izlədiyini qeyd edib: “Qarabağ”ın digər oyunlarını da analiz etmişik, o cümlədən də keçənilki “Lex”lə matçı. Lakin "Lex"in keçən ildəki vəziyyətinə də diqqət yetirmək lazımdır. "Lex" və "Rakov" tam fərqli, gücə, oyun stilinə malikdirlər. Sabahkı matçda bu kimi məsələ bizim oyunumuza təsir göstərməyəcək”.

O, rəqibi analiz edərkən hansı məqamlara daha çox diqqət ayırması barədə danışmaq istəməyib: “Oyundan öncə bu analizləri açıqlamaq düzgün olmazdı. Bu barədə məlumat vermək istəməzdim. Biz hər gün hazırlaşırıq və düşünmürəm ki, fiziki cəhətdən hansısa çatışmazlığımız olsun. Bu baxımdan problem yaşanmamalıdır”.

Şvarqe təzyiq altında oynamağa öyrəşdiklərini söyləyib: “Keçən il "Slaviya" ilə oyundan öncə də təzyiq var idi. Bu cür çətin oyunları daha əvvəl də oynamışıq. Belə matçların necə alındığını bilirik. Təzyiqə də hazırıq”.