Qara Qarayev: “Emin Mahmudov mənə dedi ki, başqa kluba getsən...”

“Mənə göstərilən etimada görə “Neftçi” rəhbərliyinə minnətdaram. Çünki həmin etimad məni bu seçimi etməyə vadar etdi. Detallı danışmaq istəmirəm. Düşündüm ki, gələcək karyeram üçün “Neftçi”də davam etmək daha faydalı olacaq. Rəhbərliyin və kapitan Emin Mahmudovun sayəsində “Neftçi”nin üzvü oldum. Bu, həm öz istəyim, həm də onların köməyi idi. Emin mənə dedi ki, başqa kluba getsən, bir dost itirəcəksən (gülür). Onunla söhbətlərdə mənə çox faydalı məsləhətlər verdi”.

Futbolxeber.az saytının mlumatına görə, bu sözləri “Neftçi”nin yeni transferi Qara Qarayevə klubun telekanalına açıqlamasında deyib.

O, ayrıldığı “Qarabağ”a təşəkkür edib: “Rəqabətli komandaya keçsəm də, “Qarabağ”ın əziyyətini, dəyərlərini heç vaxt unutmayacağam. Azarkeşlərə, "Qarabağ" camiəsinə təşəkkürümü bildirirəm. Hər bir dəyəri öz yerində qoruyub saxlaya bilərəm. "Qarabağ" azarkeşlərinin dəyəri də hər zaman məndə qalacaq, saxlanacaq. Nəticəsi nə olursa-olsun, hansı mühakimə olsa da, mənim onlara deyəcəyim söz təşəkkürdür. 18 ildə mənə möhtəşəm dəstək oldular, sahibləndilər, ailə üzvü kimi qorudular. Ömrümün sonuna kimi onlara təşəkkür edəcəyəm. Bu, mənim həm mənəvi, həm də əxlaqi borcumdur”.

Azərbaycan millisinin üzvü söyləyib ki, “Neftçi”də ailənin üzvü olmaq bir az çətindir: Çünki “Neftçi” adının hədəfləri var.  "Neftçi" adı həmişə hədəfdir. Karyeramda daha fərqli, daha uğurlu dönəm olacağını düşündüm. Bu komandanın bir parçası olmaq üçün çox çalışmaq lazımdır. Danışıqlarla bu ailənin üzvü olmaq olmaz.  Həm yığmada, həm də “Qarabağ”da necə ləyaqətlə çıxış etmişəmsə, eyni dərəcədə “Neftçi”nin də adını qoruyacağam. Həm meydanda, həm də ondan kənarda ən yaxşılardan olmaq üçün çalışacağam. Bu ailənin bir parçası olmağı özümə hədəf qoymuşam. Ümid edirəm ki, komanda yoldaşlarımın, baş məşqçinin sayəsində bu hədəfə çatacağam. Önəmli olan azarkeşlərin mənə dəstəyini qazanmaqdır. Çox çalışacağam. Çalışacağam ki, bütün oyunlarda maksimum hədəfə çatım. Bununla da onların rəğbətini, etimadını qazanım. Azarkeşlərə hansısa vədi vermək istəmirəm. Onlar iş, məhsuldarlıq görmək istəyirlər. Əlimdən gələn qədər bunları etməyə çalışacağam. Vədlər, danışıq, söz vermək yalnız meydanda olacaq. Hər birinə hörmətim var. Həmişə çalışmışam kı, bütün azarkeşlərlə münasibətimi normal saxlayım. Ümid edirəm ki, doslarımızla bir-birimizə dəstək olaraq daha yaxşı işlər görə biləcəyik".

Q.Qarayevin sözlərinə görə, karyerasını daha peşəkar şəkildə davam etdirməlidir: "Əlavə hiss, xüsusi aqressiya karyerama böyük zərbə vura bilər. “Neftçi”də də Qara adını qoruyub saxlayacağam. İstər xasiyyətdə, istər xarakterdə xüsusi dəyişiklik düşünmürəm".