Ozobiç: "İndi Rusiyaya qayıtmaq haqqında danışmaq düzgün olmaz"

Rusiyada təlim-məşq toplanışında olan “Neftçi”nin futbolçusu Filip Ozobiç “Matç TV”yə açıqlama verib.

Futbolxeber.az saytının məlumatına görə, Azərbaycan millisinin yarımmüdafiəçisi 2013-cü ildə Moskva "Spartak"ından ayrıldıqdan sonra Rusiyadan ona təklif gəlmədiyini bildirib:

"Neftçi" ilə yeni müqavilə bağlamışam. Ona görə də hazırda Rusiyaya qayıtmaq haqqında danışmaq düzgün olmaz. Klub rəhbərliyi mənə etimand göstərdi. Bu etimadı doğrultmaq istəyirəm.  2013-cü ildə “Spartak”dan ayrıldıqdan sonra bu ölkədən rəsmi olaraq heç kim zəng etməyib. Bəlkə kimsə maraqlanardı, amma belə məlumat mənə çatmayıb”.

Ozobiç "Rusiyalı futbolçulara Azərbaycana getməyi məsləhət görərdinizmi" sualını isə belə cavablandırıb: "Azərbaycanda yaxşı çempionat keçirilir. Amma Rusiyadakı qədər güclü deyil. Azərbaycanda yaxşı futbolçular çoxdur. Amma maliyyə şərtləri çətin ki, rusiyalı oyunçulara uyğun gəlsin. Rusiya Premyer Liqasında yüksək maaş təklif edən böyük klublar var”.