Ayxan Abbasov: “Gələnlər gedənlərdən də dəyərlidi”

“Yeni legionerlərə bir qədər vaxt lazımdır. Yavaş-yavaş komandaya uyğunlaşacaqlar. Onlara ümidimzi böyükdür”.

Futbolxeber.az saytına müsahibəsində bu sözləri “Turan Tovuz”un baş məşqçisi Ayxan Abbasov “Araz Naxçıvan”a qarşı keçirilən yoxlama oyununda (5:1) yeni transferlərin çıxışını şərh edərkən deyib.

O, yarımmüdafiə xətti üçün axtarışlarının davam etdiyini bildirib: “Axtarışımız davam edir. Yaxın günlərdə həll edəcəyik. Danışdığımız oyunçular var. Lakin razılıq əldə etməmişik”.

O, indidən “Turan Tovuz”un ötən mövsümlə müqayisədə daha güclü təsir bağışlayacağını söyləməyin erkən olduğunu vurğulayıb: “Gəlin tələsməyək. Bəlkə də birinci oyun idi, oyunçular futbol üçün darıxmışdılar. Əslində, komandadan istədiyimiz futbol budur. Lakin bunu saxlamaq çətindir. Bunun öhdəsindən gəlməliyik. Bəzi futbolçuların fərdi keyfiyyətləri oyunumuza rəng qatacaq. Onları seçməkdə də məqsədimiz elə bu idi”.

Ayxan Abbasov komandasının üzvü Fərid Nəbiyevin çıxışına da toxunub: “Fərid Nəbiyev bu gün öz mövqeyində Azərbaycanda ən potensiallı futbolçulardandı. Biz Fəridə böyüm ümid bəsləyirik. İnanıram ki, milli komandaya layiq futbolçudu. Amma üzərində çox çalışmalıdı”.

“Turan Tovuz”un çalışdırıcısı bir müddətdir Panama millisinin düşərgəsində olan Roderik Millerin yoxluğuna belə münasibət bildirib: “İstərdik ki, bizimlə birgə hazırlıq keçsin. Amma millinin düşərgəsindədi, məşq edir, oyunlara çıxır. Əsas odur ki, istiramət etmir. Tezliklə Miller də düşərgəmizə qoşulacaq”.

A.Abbasov bu mövsüm tovuzlu azarkeşlərin komandadan gözləntilərinin daha çox olması haqda sualı belə cavablandırıb: “Təzyiq həmişə var. Keçən il azarkeşlər çətin vaxtlarımızda belə bizdən qələbə tələb edirdilər. Ona görə də komandadan həmişə qələbə istəyəcəklər. Amma biz vəziyyətə real baxırıq. Tələssək, tez yanarıq. Əlbəttə, artırmaq istəyirik. Artırmaq dedikdə söhbət təkcə avrokuboklara vəsiqədən getmir. Klub olaraq böyüməliyik. Əsas məqsədlərimizdən biri azarkeşlərimizi sevindirməkdir”.

O, Runi Evanın gedişi barədə söyləyib: “Bu gün adlar haqda fikirləşmirik. Təbii ki, hər gedən futbolçunun təsiri olacaq. Biz də gedənlərin yerini doldurmağa çalışırıq. Gətirdiyimiz futbolçular Runidən zəfi deyillər. Otto Con, Petkov, yaxud Paçu olsun. Belajinin özünə böyük ümidimiz var. Hər gedən fubolçu bizim üçün dəyərli idi, lakin gələnlər onlardan da dəyərlidi”.