“İstərdim ki, Qurban Qurbanovun uğurlarını digər yerli məşqçilər də davam etdirsinlər”

“Təbii ki, yerli məşqçilərimizin işsiz qalmamalarını və daha çox uğur qazanmalarını istərdim”.

Futbolxeber.az saytına açıqlamasında bu sözləri veteran futbolçu, “Neftçi”nin sabiq seleksiyaçı məşqçisi Bəxtiyar Musayev azərbaycanlı və əcnəbi məşqçilərin ölkəmizdəki fəaliyyəti barədə danışarkən deyib.

O qeyd edib ki, digər yerli məşqçilərin də Qurban Qurbanov kimi uğur qazanmasını arzulayır:   

“Son illər azərbaycanlı məşqçilər müəyyən nəticələr verirlər. Təbii ki, bu baxımdan ən çox güvəndiyimiz mütəxəssis Qurban Qurbanovdu. O, işi ilə nəyə qadir olduğunu sübuta yetirib, Azərbaycan futbolunda böyük uğurlara imza atıb. Çox istərdim ki, Qurban Qurbanovun uğurlarını digər yerli məşqçilər də davam etdirsinlər”.

B.Musayev əcnəbi məşqçi seçimində müəyyən amillərə diqqət yetirilməli olduğunu vurğulayıb: “Ancaq yerli məşqçilər işləməlidi fikrini səsləndirmək olmaz. Bu, peşəkarlıq baxımından da doğru deyil. Əcnəbilər də olmalıdı. Amma baxır hansı əcnəbi. Xarici məşqçi gətirməmişdən əvvəl onun işini araşdırmaq lazımdı. Elə məşqçi gətirilməlidi ki, komandaya faydası dəysin, gəldiyi ölkəyə yuxarıdan aşağı baxmasın, yalnız pulu düşünməsin”.

Futbolxeber.az-ın teleqram kanalına abunə olun