Konstantin Vasilyev: “Hər iki komanda qələbə qazana bilərdi”

Estoniya millisinin kapitanı Konstantin Vasilyev Avro-2024-ün seçmə mərhələsində millimizə qarşı keçirilən oyun (1:1) barədə danışıb.

Futbolxeber.az saytına açıqlamasında 38 yaşlı futbolçu hər iki komandanın meydana qələbə üçün çıxdığını bildirib:

"Bu gün biz də, Azərbaycan millisi də qələbə qazanmaq istəyirdi. Çünki hamımız bilirik ki, qrupdakı digər rəqiblər güclüdür. Oyuna yaxşı başladıq. İlk hissədə üstün tərəf biz idik. Təəssüf ki, ikinci qolu vura bilmədik. Halbuki bunun üçün yaxşı şanslarımız var idi".

O, fasilədən sonra milli komandamızın daha yaxşı təsir bağışladığını vurğulayıb: "İkinci hissədə fərqli alındı. Bilirdik ki, hesabda geri olduğu üçün Azərbaycan millisi taktiki dəyişiklik edəcək. Belə də oldu. Təəssüf ki, ikinci 45 dəqiqənin əvvəlində təzyiq altında idik. Rəqib üstünlüyə yiyələnərək hesabı bərabərləşdirdi. Standart epizoddan qol buraxmağımız məyusedicidir. Matçın sonu qarşılıqlı hücumlar şəratində keçdi. Hər iki komanda qələbə qazana bilərdi".

İbrahim CƏFƏROV

Futbolxeber.az-ın teleqram kanalına abunə olun