De Byazi: “Qovsalar, gedəcəm"

“İlk hissəni standartlardan çox aşağı səviyyədə oynadıq. Heç cür oyunumuz alınmırdı, düzgün ötürmələr verə bilmirdik. Ona görə fasilədə üç əvəzetməyə getdik”.

Futbolxeber.az saytının məlumatına görə, bu sözləri milli komandamızın baş məşqçisi Canni de Byazi Avro-2024-ün seçmə mərhələsində Estoniyaya qarşı keçirilən oyundan (1:1) sonra deyib.

İtaliyalı mütəxəssis fasilədən sonra daha üstün təsir bağışladıqlarını qeyd edib: “İkinci hissədə çox yaxşı oynadıq. Daha çoxuna layiq idik. Son dəqiqədəki epizod qol olsaydı, bəxtimiz gətirsəydi, oyunu uda bilərdik. İlk yarıya görə məyus oldum, lakin ikinci hissədən isə çox razıyam”.

De Byazi start heyətini düzgün müəyyənləşdirməməsi haqda sualı belə cavablandırıb: “Çoxdandır ki, 4-2-3-1 sistemi ilə oynayırdıq. Matçdan qabaq beynimə şübhələr gəlmişdi ki, sistemi dəyişim. Amma sistemi dəyişsəydik, alınmasaydı, siz məni "öldürərdiz". İlk hissədə oyunumuz yaxşı getmədi və komandanı dəyişdik. Bizdə mövsüm bitib, çox oyunçular yorğundur. Estoniya bizdən daha hazırdır, çempionatlarının ortasıdır. Estoniya millisi fiziki cəhətdən yaxşı keyfiyyətlərə malikdir. Nəticəyə görə məyusam”.

Baş məşqçi qrupumuzun çətinliyini qabardıb: “Bizim qrupumuz haqda nə düşünürsüz? Neçənci yerə çıxmalıyıq? Azərbaycan hara çıxmalıdır? Uğur qazanmaq üçün yaxşı maşının olmalıdır. Siz məndən yaxşı bilirsiz ki, futbol cəmiyyətində nələr baş verir. Az vaxtda bu qədər az futbolçu ilə nəsə etmək çətindir”.

De Byazi millimizdəki işini bitirmək barədə düşünmədiyini vurğulayıb: “Bir şeyi yarımçıq qoyub getmək xarakterimdə yoxdur. Daha güclü komandadan təklif var idi. Müqaviləm olduğuna görə getmədim. Əgər getsəm, nə baş verər? Məni qovsalar, gedəcəm”.

Futbolxeber.az-ın teleqram kanalına abunə olun