Elmar Baxşıyev: “Səhvlər hazırlıqla bağlı deyil”

“Bilirdik ki, bizi ağır oyun gözləyir. Sıx qrafikdə oynadığımız üçün çətinliklər öncədən görsənirdi. Amma düşünürəm ki, komandam bu gün yaxşı mübarizə aparıb, layiqli qələbə qazandı”.

Futbolxeber.az saytının məlumatına görə, bu sözləri “Qəbələ”nin baş məşqçisi Elmar Baxşıyev Azərbaycan Premyer Liqasının 32-ci turunda “Səbail” üzərində qazanılan 3:2 hesablı qələbəni şərh edərkən deyib.

Mütəxəssis 3:0-dan sonra qapılarına 2 qol görmələrinə belə aydınlıq gətirib: “3:0-dan sonra komandanın tempi aşağı salması normaldı. Sevindirici haldı ki, komanda özündə güc tapıb 4-cü qol vurdu”.

Baxşıyev eyni anda 3 futbolçunu əvəzləməsinin səbəbini belə izah edib: “Əvəzetmələri futbolçuların durumuna görə edirik. Emin Səfərov, Omar Hani meydana daxil olduqdan sonra tempi ələ aldıq. Bəzi futboçuların durumu 90 dəqiqə oynamağa hazır deyildi. Asif Məmmədov bizim üçün önəmli oyunçudur. Sadəcə qarşılaşmadan öncə xəstələnmişdi. Hətta bu gün meydana çıxması sual altında idi. Amma xarakter göstərib oyuna çıxdısa, komanda şəklində ona təşəkkür edirik”.

O, Murad Musayevin səhvlərini hazırlıqla bağlamayıb: “Tək Murad səhv etmir, Məqsəd də səhv, Ruan da.  Sırf onun üzərində dayanmırıq. Bu səhvlər hazırlıqla bağlı deyil”.

E.Baxşıyev son matçlarda qapıda Atanqanaya şans verməsindən də danışıb: “Bəli, son matçlarda Atanqananın üzərində dayanırıq. Amma səviyyəcə o da, Səlahət Ağayev də eynidir. Kim daha hazır olursa, o da meydana çıxır”.

“Qəbələ”nin çalışdırıcısı rəqibin ikinci hissədə üstünlüyü ələ almasının etdiyi əvəzetmələrlə bağlı olmadığını vurğulayıb: “Üstünlüyü 3 futbolçunun əvəzlənməsinə görə rəqibə vermədik. Sadəcə hesab belə oynamağımıza gətirib çıxarırdı. Düşünürüm ki, əvəzetmə etməsəydik belə, tempi aşağı saldığımıza görə rəqib üstünlüyü ələ alacaqdı. Unutmayaq ki, dörd gündən bir oynayırıq. Ona görə də eyni tempi saxlamaq ağırdı”.

Mütəxəssis Yaovi Akakpoya şans verməməsi barədə sualı belə cavablandırıb: “Oyun elə gedirdi ki, rəqib üstümüzə gəlirdi. Buna görə də daha bir hücumumeyilli oyunçu buraxmağa ehtiyac duymadım. Yaovi inandığımız futbolçudur. Onunla müqaviləni yeniləyəcəyik. Sadəcə onun mövqeyində oynayan futbolçular hazırda pik formadadırlar”.

Baxşıyev transfer çalışmalarından da söz açıb: “Yerlilərdən Urfan Abbasovla müqaviləni yeniləmişik. Yaovi ilə də razılıq əldə olunub. Proses davam edəcək”.

Sonda mütəxəssis yeni mövsümdə "Qəbələ"də qalıb-qalmayacağı barədə sualı cavablandırıb: “Mən “Qəbələ”də yeni sima deyiləm. Hələ ki, buradayam. Mətbuatda nə qədər xəbərlər çıxsa da, “Qəbələ”nin baş məşqçisiyəm və bütün fikrim buradadır”.