Vüqar Əsgərli Murad Musayevin cavabını verdi: “Sabah”ın oyunçuları vaxt uzadırdı”

“Şamaxı”nın baş məşqçisi Vüqar Əsgərli “Sabah”ın çalıdırıcısı Murad Musayevin komandası haqda səsləndirdiyi fikirlərə cavab verib.

Futbolxeber.az saytının məlumatına görə, gənc məşqçi rəqibin futbolçularının meydanda vaxt apardıqlarını bildirib:

“Murad Musayev hər dəfə mətbaut konfransında qeyd edir ki, "Şamaxı"nın oyunçuları vaxt aparır, yerə yıxılırlar. Bu gün əksini gördük. Sevindirici deyil. Halbuki əllərində bu cür möhtəşəm futbolçular var. Amma "Şamaxı" gənclərdən formalaşıb. İstəyərdik ki, bizə qarşı belə hərəkətlər etməsinlər. Hakim haqda biz də çox şey danışa bilərik, amma danışmırıq. Çünki hakim də insandır, səhv edə bilər. Bugünkü hakimlik möhtəşəm idi, əla oyun apardılar. Ancaq oyuna üç dəqiqə əlavə etdilər. Halbuki "Sabah"ın bəzi oyunçuları özünü yerə atmaqla vaxt uzadırdı. Autlarda topu götürmək istəmirdilər. Amma "Sabah"a gələcəkdə uğurlar arzu edirəm”.