Abbasov yeni müqaviləsi barədə: “Əgər gücüm çatmayan tələblər olsaydı...”

Ayxan Abbasov “Turan Tovuz”la yeni müqavilə imzalaması haqda danışıb.

Futbolxeber.az saytının məlumatına görə, o, stabil komanda yaratmaq istədiklərini bildirib:

“İlk növbədə rəhbərlikdən məndən nə istədiklərini eşitdim. Bu gün reallıq var. Əgər gücüm çatmayan tələblər olsaydı, razılaşmazdım. Lakin rəhbərliyin səbrli olması bizə birgə inkişaf etmək şansı yaradır. Qısa zamanda uğur qazanmaq çətindir. Düzdür, bəlkə ideal şərait qarşılığında 1 ildə də nəticə qazanmaq olar. Lakin bu, davamlı olmayacaq. Biz isə stabil komanda yaratmaq istəyirik. Rəhbərlik də bu düşüncədədir. Onların yanaşması xoşuma gəldi. Əlbəttə, hər məşqçi istəyir ki, bir yerdə mümkün olduğu qədər çox işləsin. Bəzən yer dəyişikliyi çətinlik yaradır. Bir sözlə, rəhbərliklə baxışlarımız eynidir. Hazırda əsas diqqətimizi nəticəyə yönəltməmişik. Təbii ki, bu o demək deyil ki, nəticə istəmirik. Xeyr, gücümüz çatdığı qədər bütün rəqiblərə qarşı mübarizə aparacağıq. Bu gün futbolçulardan ilk istəyim öz meydanımızdakı matçlarda uduzmamaqdır. Rəqiblər səfərdə olduqlarını hiss etməlidirlər”.